26.12.12

Exposición de textos con instrucións

Co alumnado de 3º de ESO, nas clases de galego traballouse a elaboración de textos instrutivos, descritivos, de explicación de nomes... En todos os casos pedíaselle ao alumnado que presentase o texto de forma artística. Acolleron a proposta con entusiasmo e botáronlle, nalgúns casos, imaxinación, de tal xeito que realizamos con eles unha exposición.

Exposición celular.

Durante este trimestre, o departamento de bioloxía ven realizando unha serie de actividades de reforzo dos coñecementos teóricos. Nesta ocasión, o lumnado de 3ºA, 4ºA e 4ºB esmeráronse na elaboración de maquetas de Células Eucarióticas, traballadas con diversos materiais: plastilina, cartón, porespán, xeso, tea, cola, etc... Ademais de afondar nos coñecementos, buscouse mediante este traballo o fomento do traballo en grupo e a interdisciplinariedade co departamento de tecnoloxía. Con todas estas células fíxose unha exposición durante as dúas últimas semanas do trimestre.

16.12.12

Día dos Dereitos Humanos e O neno can

O día 10 de Decembro parte do equipo de biblioteca estabamos en Madrid recollendo, por fin, o 3º Premio Nacional de Boas Prácticas en Bibliotecas Escolares. Pero no centro deixamos todo listo para traballar, polo menos con parte do alumnado, os Dereitos Humanos. Durante o trimestre, o alumnado de 2º de ESO estivo traballando nas aulas o libro "O neno can", escrito a catro mans por Fina Casalderrey e Francisco Castro. Este último visitou ao alumnado no día 10, e en dúas sesións falouse dos dereitos reflectidos no libro. En cada sesión, o autor foi presentado por dous alumnos. Tamén lle deron a coñecer o traballo realizado nas aulas, nin máis nin menos que a continuación de algúns dos contos. Francisco acolleu moi ben a idea e deu conformidade para publicalos no blog, cousa que facemos no Calameò ao final desta entrada. O alumnado estivo moi participativo e moi concienciado. Ao final, unha morea de libros para asinar.

11.12.12

Día Internacional Contra a Violencia de Xénero

Seguindo a tradición, para esta data preparamos varias actividades. No propio día 25 realizamos sesións de vídeo no salón de actos, co alumnado de 1º e 2º de ESO. Trátase de vídeos para concienciar sobre este problema, que inclúen cancións e recomendacións e recensións de libros. Aproveitamos videos que tiñamos realizados en anos anteriores con algunha novidadee como a canción "Lo que Ana ve", realizado con algunhas imaxes de traballos feitos polo alumnado. Desde a biblioteca convocouse un concurso de marcapáxinas con lema, que tivo unha participación aceptable. Dous dos marcapáxinas foron seleccionados para facer unha tirada e usarémolos na biblioteca durante este curso. Desde as clases de plástica, a iniciativa de Víctor, propúxose a confección dunha manta, de tal xeito que alumnado e profesorado, provistos de fío e agulla, foron cosendo esta manta solidaria, símbolo da igualdade.

20.11.12

Semana da ciencia en galego

Do cinco ao nove deste mes celebramos a Semana da Ciencia en Galego. Os departamentos de Ciencias Naturais, Física e Plástica, en colaboración coa biblioteca organizaron polos corredores do instituto uns laboratorios de ciencias aos que asistiron distintos grupos de todos os niveis para poñer en práctica diversos experimentos: volcáns, ovos dentro de botellas, ovos saltaríns, uvas pasas e outros ingredientes formaron parte destes experimentos que o alumnado acolleu con entusiasmo e responsabilidade. Os departamentos prepararon os murais onde se explicaban os pasos a seguir para levar a cabo os experimentos que despois o alumnado foi poñendo en práctica. Nalgunhas das sesións, o alumnado de cursos superiores explicaba os experimentos aos máis pequenos.
O departamento de Plástica realizou unha busca documental na biblioteca sobre a figura de Leonardo Da Vinci e a partir de aí elaboraron debuxos de algúns prototipos do xenial artista. Desde as aulas de tecnoloxía colaboraron cunha investigación sobre a calculadora de Ramón Verea.
Rematou a semana cunha conferencia para os bacharelatos de ciencias, As tecnoloxías do ADN aplicadas á pesca e á acuicultura, a cargo do ex vicerrector de investigación da USC e catedrático de bioloxía molecular, Manuel Rey Méndez.

25.10.12

Mes da biblioteca

 
Canón e pizarra dixital
Novos equipos
Efectivamente, este foi un bo mes para a nosa biblioteca. Ao longo del fomos introducindo cambios que viñeron propiciados polos diñeiros do 3º Premio Nacional de Bibliotecas Escolares. Entre outras cousas, fixemos unha inversión en albanelería, suprimindo parte da cristaleira do tabique interior, o cal nos permitiu a instalación dunha pizarra dixital co seu correspondente canón a un lado, e ao outro a instalación de novos andeis que acollen as lecturas dos distintos itinerarios recomendados e a literatura xuvenil máis demandada. 
Armarios colgantes

Vista desde a entrada
 
Fixéronse tamén novos andeis para ampliar a sección de literatura galega e a sección de pelis DVD, e un armario colgante que servirá de almacén para materiais diversos. Mellorouse a instalación eléctrica e instalemos un equipo de son cos seus altofalantes, que nos permitirá realizar na biblio as sesións de vídeos, así como dispoñer de micro para os recitais e conferencias. Dispoñemos tamén dunha nova impresora A3 para o equipo e unha impresora laser para uso do alumnado. Por fin nesta semana, na que se celebra o día das bibliotecas, temos case todo rematado e reubicado. Agora a sacarlle partido.

Novos andeis

19.10.12

Roteiro por Coia

O vindeiro xoves 25 de outubro ás 19:30 horas no salón de actos do instituto terá lugar a presentación do Roteiro polo barrio de Coia elaborado por profesorado do noso insti. O acto (público) comezará cunha charla sobre a toponimia de Coia a cargo de Iván Sestay Martínez, autor do libro "Toponimia do Val do Fragoso I. Coia".  Podedes consultar a wiki do roteiro en http://roteiroporcoia.wikispaces.com/


17.10.12

Premio Xuventude Crea para Inés

E un pracer para toda a comunidade educativa en xeral, e para o equipo da biblioteca en particular, que a que foi alumna nosa ata fai so tres meses, Inés Rodríguez Naz, veña de estrenarse no mundo dos premios literarios fóra do insti, pois aquí xa ten acadado varios. Inés ven de gañar o primerio premio da especialidade de relato breve do certame galego de creadores novos Xuventude crea 2012, coa obra Mitos en ámbar . Os nosos parabéns para Inés, que durante os seis anos que estivo aquí foi unha activista da biblioteca, participou no club de lectura (asistindo incluso ás Xornadas dos clubs de lectura celebradas recentemente en Santiago), foi gañadora varias veces da actividade O libro do mes, da Olimpíada do Saber e de varios certames literarios no insti, o último o de Toloscontoscurtos. Ademais deulle tempo a acadar matrícula de honra e a obter un dos Premios Extraordinarios de Bacharelato. Agardamos o seguinte paso e pode que dentro de pouco a teñamos de volta por aquí como autora.

18.6.12

Ópera no instituto

Os días 12 e 13 de xuño fixéronse dúas representacións da ópera de Donizetti, O elixir do amor, a cargo do alumnado de 1º de bacharelato de artes escénicas, música e danza. Meses de ensaios dirixidos polo profesor Julen Cantabrana para acadar a excelencia nunhas representacións que emocionaron tanto ao alumnado como aos pais, nais e profesores. Non temos palabras para describir a emoción que sentimos ao ver ao noso alumnado dedicándose con tanta paixón ao bel canto durante todo o ano, unha experiencia inesquecible.
A obra é unha adaptación ao galego de L'elixire d'amore, de Gaetano Donizetti, co director, Julen, ao piano e con Rodrigo á trompeta. Como axudante de dirección e a cargo do libreto estivo a profe de música e da biblioteca, Ánxeles. O atrezzo a cargo de Luz Valencia. Os personaxes:
Adina: Berenice Fernández
Nemorino: Alfonso Castro
Belcore: Flavio Sedano
Irmáns Dulcamara: Flavio Granja, Diego Alonso e Roberto Comesaña
Giannetas: María Boubeta e Eva Pereira.
Coro: Miguel Alonso, Sergio Hernández, Diego Fernández, Diana Álvarez, Carmen Bobillo, Neila Escanciano, Iria Fernández, Brais Iriarte, Yaiza Pérez, Mantín Verde e Daniel Villar.
Case hora e media de espectáculo na que algunha lagrimiña correu no patio de butacas despois da romanza Unha furtiva lágrima, interpretada por Alfonso (último vídeo). Resumimos nos seguintes vídeos (perdón polos fallos técnicos, pero a gravación foi improvisada





17.6.12

A linguaxe sexista

Desde hai unha semana podedes ver a exposición que se fixo en colaboración do departamento de galego. Ante a polémica suscitada este ano por parte de membros da Real Academia, decidimos realizar materiais para unha exposición sobre a linguaxe sexista para traballar co alumnado de 4º dúas últimas semanas do curso. Tamén elaboramos un tríptico do que se fixeron cen copias para distribuír polo centro. 


16.6.12

Os libros de 3º A

Nas clases de galego de 3ºA, durante o primeiro trimestre traballaron as características dun texto descritivo desde distintas ópticas: descrición dunha persoa; unha hipérbole; e un espazo xeográfico. Propúxoselles facer entón unha descrición do seu lugar favorito, e facelo a modo de tarxeta e ben presentado; e cada un dos rapaces elixiu o seu. Coas tarxetas fíxose unha exposición.
O mesmo sucedeu cos nomes. Na parte de historia da lingua viron as orixes das palabras e, como non, as dos nomes. Propúxoselles entón buscar a orixe, o significado dos seus, a lenda que se lle adxudicaba e a correspondencia noutras linguas. E de novo realizaron unhas fermosísimas tarxetas que se expuxeron e acabaron colocadas na árbore de Nadal.
Desde a biblioteca, despois de ver este trafego que houbo cos dicionarios de nomes e coas guías acordamos coa profesora agrupar todos os traballos nun libro especial, ou en dous. Naceron así o libro dos nomes e o libro dos lugares, que se ficharán na biblioteca. Este é o resultado:

6.6.12

Visita de Eduardo Santiago

O día 28 de maio visitounos o autor Eduardo Santiago, que fixo dúas sesións na biblioteca con grupos de 1º
bacharelato e 4º ESO. Previamente, a súa obra 2044 forfora traballada e comentada nas clases de ética, antropoloxía e tecnoloxía. Trátase dunha novela de ciencia ficción na que, en palabras do autor, o importante é o cruce de ideas que subxacen debaixo dunha trama que nos atrapa: muller e sociedade, a mocidade, a organización das cidades, o ensino, a relixión, as teorías sobre a orixe do universo… todo isto xogando cun tempo imaxinario, confrontando a realidade coa realidade virtual, plantexando un dos problemas filosóficos de sempre, que nos sitúa na vía da metafísica. Queremos destacar das charlas, e tamén da obra, a interesante visión que se da dunha xuventude comprometida, con valores, rapaces/as normais e á vez intelixentes, defensores das resolucións dialécticas dos conflitos. Gustou moito tamén a idea de usar a tecnoloxía para a creación dunha sociedade máis xusta, sobre todo no reparto da riqueza.
 Ao remate, Eduardo asinou numerosos exemplares do seu libro

2.6.12

Charla de David Gómez

No marco do proxecto de centro, como dixemos antes, o día 29 de maio visitounos o atleta, campión de España de décatlon, David Gómez, ex alumno noso. David contou, ao longo de tres sesións para o alumnado de 1º, 2º e 3º de ESO, a súa experiencia como deportista olímpico en Atenas 2004 e Pequín 2008. Contou como desde pequeno xa tiña en mente participar nos xogos, analizou a súa traxectoria como deportista desde que estivo no instituto, falou da súa afección a outros deportes e sobre todo, falou de  perseveranza nos obxectivos que un se marca, tanto nos estudos como en calquera outro obxectivo vital. Alegrámonos dos éxitos deste atleta noso e, agradecéndolle a visita, agardamos a súa clasificación para Londres 2012.

30.5.12

Culture Class

O luns tivemos unha Culture Class. É unha actividade nova no noso centro. A editorial Burlington Books traballa cun grupo de formadores que levan a cultura británica dunha forma amena polos centros de ensino de secundaria. Despois de que varias profesoras do departamento de inglés asistiran o curso pasado a unha experiencia similar para profesorado, decidiron traer a actividade á nosa biblioteca. Fixéronse tres “clases” que
 presentaron dunha maneira divertida e interactiva diversos aspectos da cultura británica: a comida, a Familia Real, o deporte, a música, a xente famosa… Todo mundo tivo a oportunidade de participar de xeito activo é, ao final, houbo un pequeno concurso como os da tele un premio para o/a gañador/a.

Este ano a actividade foi organizada para todos os cursos de 1º ESO, esperamos ter a oportunidade de repetir o curso que ven. Pasárono moi ben vendo todos os erros que cometen cando pronuncian inglés, incluso falaron por teléfono coa “mamá” do profesor inglés.  

21.5.12

Letras Galegas con música e poesía

Coma todos os anos, celebramos na biblioteca a festa das Nosas Letras. Este ano dedicadas a Valentín Paz-Andrade, pero tamén ao medio século desta festa. Fixemos dúas sesións na biblioteca, que comezaron cunha lembranza da figura de Paz-Andrade e a lectura dos seus poemas Cando ti volvas e Noso Alexandre, Mártir por parte do presentador. Na primeira sesión, o alumnado de 1ºF recitou poemas de diversas autoras galegas -Marica Campo, Pilar Pallarés, Mª Xosé Queizán , Luz Pozo- e tamén de Celso Emilio, acompañados dos seus instrumentos e tendo de fondo power points elaborados por eles. Como público, alumnado de 1º Bach. e de 4º ESO, que tamén recitaron ao son da guitarra. Na segunda, que comezou coa entrega de premios dos concursos artísticos e literarios da biblioteca, o alumnado de 1º e 2º ESO, xunto con outro grupo de 1º Bach. recitou poemas e textos en prosa de diversos autores -Rosalía, Curros e Sechu Sende, enntre outros-  que traían preparados das clases. Contamos coa actuación estelar do noso gaiteiro Diego, que acompañado ao piano polos profes de música, Ángeles e Julen, interpretou varias pezas entre lectura e lectura. Deixamos unha serie de vídeos que recollen os momentos estelares da xornada.






A continuación, unha reportaxe fotográfica para aqueles/as que non saídes nos vídeos:

19.5.12

Conferencia de Mina Shayan

O venres 11 de Maio tivemos unha charla na Biblioteca  impartida pola investigadora iraniana da Universidade de Vigo, Mina Shayan e foi organizada pola profesora Mercedes Oliveira do departamento de Filosofía. Mina deu dúas conferencias para o alumnado de Antropoloxía (1º Bacharelato D), Ética e Filosofía do Dereito (2ºBacharelato C) e dous grupos de Ética de 4º
 ESO.
O relatorio consistiu nunha mirada á historia das mulleres no Irán do século XX. O espertar, as rebeldías, as revolucións e a resistencia para acadar os seus dereitos. Os avances na educación feminina e a presenza das mulleres na sociedade, nas universidades e no traballo.

Mina recalcou a influenza das mulleres na modernización do país a
 través da educación e da loita feminista. Remontouse á revolución constitucional de 1905, periodo no que as mulleres comezaron a atopar espazos para reivindicar os seus dereitos. Contou tamén como a derrota constitucionalista a mans de Reza Shah Pahlavi implicou cambios superficiais, como a supresión do veo, pero de facto supuxo a represión dos movementos feministas. Coa revolución Branca de Mohamed Reza Pahlavi, as mulleres conseguen en 1963 o dereito ao voto e a entrada no parlamento e no goberno.

Explicounos algunhas claves da participación activa das mulleres na revolución islámica de 1979 contra o Shah, para rematar sinalando que a loita feminista é especialmente importante a partir deste momento, xa que as mulleres foron despoxadas de moitos dereitos adquiridos ao longo do século XX e teñen que enfrontarse a unha leis misóxinas.

16.5.12

Tim Bowley e Charo Pita

Luns 14, pola tarde, sesión de contacontos en inglés e galego. Estreamos aquí as presentacións de Prezi. Hai que darlle ao play e esperar un pouquiño a que cargue. Na opción "More" podedes seleccionar para ver en pantalla completa e autoplay. Agardamos que vos guste a ferramenta.

3.5.12

Libros con ADN na semana do libro

Celebramos este ano a semana do libro cunha exposición de libros moi especial, aproveitando que o día 23 era, ademais de Día do Libro, tamén o Día Internacional do ADN. E esta vez preparouse todo desde o departamento de Ciencias Naturais e colaborou tamén os departamento de Tecnoloxía.

O alumnado de bioloxía de 4º A coa súa profe Carmen Martínez, construíron un modelo de molécula de ADN usando materiais reciclables, botellas e latas para realizar os nucleótidos, aprendendo así os elementos estruturais básicos do ADN. Tratábase de estimular o interese pola ciencia, fomentar o traballo en equipo e o intercambio de ideas para solucionar os problemas que puidesen xurdir durante a construción.

O traballo espertou o interese de algúns alumnos de 2º bach., e deste xeito Yago e Rodrigo tamén construíron as súas moléculas, unha con gominolas e outra con materiais cerámicos. E tamén un grupo de tecnoloxía, dirixidos polo profe Rafael, construíron unha gran molécula con estrutura metálica e bolas de plástico.

Con todas elas fixemos unha exposición acompañando aos libros sobre o ADN cos que se vai traballar en bioloxía e outras lecturas que teñen ás ciencias naturais como tema central.

23.4.12

PARA UN AMBIENTE DE LECTURA NA ESCOLA

Sumámonos á proposta que nos chega desde o IES Pedra da Aguia e reproducimos integramente o texto e o manifesto que neste día do libro están a difundir moitas bibliotecas galegas:
 "Coincidindo co Día do Libro 2012, existe unha iniciativa impulsada por Luis Arizaleta (especialista en lectura e desenvolvemento de iniciativas culturais), e na que temos a honra de participar, que nos fai reflexionar aos que a subscribimos, sobre o que el coñece desde hai máis de vinte anos: o ambiente de lectura na escola, e é ese o nome do manifesto que lles invito a ler. Son doce puntos moi breves pero que, de telos realmente presentes, suporía un verdadeiro reformulación da experiencia lectora, persoal e cultural dos nosos rapaces e rapazas. Para iso dirixímonos a toda a ampla comunidade vinculada coa lectura: escritores, mediadores, contistas, narradores, pais e nais, editores, profesionais da educación... Aínda que sempre oímos aquilo de “niso todos estamos de acordo” o certo é que no mundo vinculado ao libro e á lectura hai moita leria e adorno estéril, pero tamén temos que dicir que hai moita xente traballando, no noso país e máis alá del, para que as cousas non sexan así. Sabemos que hai unha corrente forte e consolidada de xente que traballa para que os pequenos, medianos e maiores vivan a lectura con pracer e sabemos que, ademais, conségueno. E non deixa de ser significativo que xunto a todas esas persoas, que irán en aumento, ou non, non tiveran dúbida en estampar a súa su firma xente como Francesco Tonucci, ou escritoras como Rosa Aneiros ou Fina Casalderrey, de entre un grupo de 108 profesionais relacionados coa lectura. O dito, propóñovos a súa lectura:"

20.4.12

Miguel Anxo Fernández

O luns 16 pasamos a tarde con Miguel Anxo Fernández, último acto do que foi un trimestre dedicado á novela policial. O alumnado do club de lectura lera Lume de cobiza, e dous grupos de 4º Un nicho para Marilyn. Falounos Miguel Anxo sobre as orixes de Frank Soutelo e de como se lle ocorren os casos, coma o de Lume de cobiza a partir da vaga de incendios que arrasou Galiza. Pero sobre todo afondou nalgunhas claves da novela policial e as súas relacións co mundo audiovisual, do que é un profundo coñecedor. Fixo un repaso da evolución do xénero na TV a través de tres series que marcaron diferenzas: Canción triste de Hill street, Miami vice e The wire. Escoitamos todos durante máis de hora e media unha charla que respondeu por si sola todas as dúbidas que o alumnado ía plantexar e que superou as nosas expectativas. De momento deixamos unhas fotos, sen contar nada máis mentras agardamos pola crónica que Yago nos pediu facer. Teremos paciencia.


16.4.12

Conferencia de Ana Ulla Miguel e premios matemáticos

O día 11 de abril tivemos a conferencia de Ana Ulla: "A Astronomía que podemos facer coas Matemáticas que xa sabemos", dirixida fundamentalmente ao alumnado participante nos concursos matemáticos

Na primeira parte da conferencia, e despois de facernos unha introdución sobre a teoría do big bang sobre a orixe do universo, a profesora falou sobre distintas estruturas do universo (galaxias, constelacións, o sistema solar…), así como das unidades de medida utilizadas polos astrónomos. Na seguda parte, despois de comentar como se lle ocorreu ao científico grego Erastóstenes a idea para calcular o raio da terra simplemente ao comprobar que había un día no ano no que os obxectos non daban sombra na cidade de Syene (Exipto), mostrou ao alumnado como calcular a lonxitude do mesmo utilizando as ferramentas matemáticas xa coñecidas por eles e os datos que coñecía Erastóstenes.
Apoiada nunha presentación con bonitas imaxes do universo, a conferencia resultou moi amena.



Tamén entregou os premios aos gañadores do concurso de resolución de problemas e de relatos matemáticos.

15.4.12

Ruta literaria: onde o mundo se chama Celanova

O 12 de abril fomos cos mozos e mozas dos clubs de lectura a Celanova e Vilanova dos Infantes. O noso obxectivo era homenaxear a Celso Emilio no seu centenario. Ao longo do curso falamos del na sesión que tivemos sobre poesía social no primeiro trimestre, e voltamos na última sesión onde informamos do percorrido da nosa ruta e repartimos exemplares de Longa noite de pedra. Escollemos as lecturas que se ían facer en público e preparamos con elas un libriño que repartimos entre os participantes. Non podiamos desproveitar a ocasión para incluir na ruta tamén a Curros Enríquez. Remitimosvos á crónica que fai Yago no blog do club de lectura para ver por extenso como foi. Comezamos coa visita guiada á casa dos poetas, onde fixemos as lecturas xunto co alumnado do IES de Maceda cos que coincidimos. Despois visitamos o mosteiro de San Salvador e fixemos as lecturas dentro do claustro. A continuación lemos na rúa (abarrotada en día de feira)diante dos bustos de Celso Emilio e de Curros. Dirixímonos despois a Vilanova, con visita guiada á Torre e aí chegou tamén a chuva, polo que nos quedou sen ler o poema á Virxe do Cristal ao aire libre. De camiño a Ourense lemos no bus. E para rematar, un regalo: levamos ao alumnado ás termas de Outariz, o ceo abríuse e disfrutaron dun relaxante baño termal.



31.3.12

A Astronomía que podemos facer coas Matemáticas que xa sabemos

Como remate ás actividades do III ConCurso de problemas de matemáticas e II concurso de relatos matemáticos e incluída no plan lector do departamento de matemáticas e no proxecto lector do centro teremos o vindeiro 11 de abril unha conferencia co título:
"A Astronomía que podemos facer coas Matemáticas que xa sabemos"
a cargo de Ana Ulla Miguel, Licenciada en Ciencias Físicas e doutora en Astrofísica pola Universidade de La Laguna. Profesora titular da Universidade de Vigo. Os seus traballos no campo da Astronomía desenvolvéronse na Universidade de Tromsø (Noruega), o Instituto Niels Bohr de Copenhaguen, o Instituto de Astrofísica de Canarias, o Laboratorio de Astrofísica Espacial e Física Fundamental de Madrid e a Axencia Espacial Europea. Á marxe da súa actividade docente como profesora da Facultade de Ciencias en Vigo, e de investigación en diversos campos da Astrofísica e as Ciencias da Terra, desenvolve dende hai máis de dez anos unha intensa actividade de divulgación científica organizando dende o ano 2000 un Obradoiro de Astronomía e Astrofísica ou participando en programas como “Feliz Aniversario HAL”, “Polos Mares de Galicia”, “Unha universidade, un Universo” ou “Contos e coplas de estrelas”, entre outras actividades. Durante o Ano Internacional da Astronomía, celebrado en 2009 en 148 países, formou parte do equipo de traballo español, como coordenadora de actividades en universidades. Membro do padroado da Fundación Ceo, Ciencia e Cultura (o cal xestioa o Observatorio Astronómico de Forcarei), foi a súa presidenta dende a súa constitución en 2007 ata outubro de 2010. Membro da Sociedade Española de Astronomía e secretaria do Grupo Especializado de Astrofísica da Real Sociedade Española de Física (do cal foi presidenta entre 2007 e 2011).

19.3.12

Unha mañán con Núria Pradas

O día 15 de marzo visitounos Núria Pradas, autora de “Heka, un viaje mágico a Egipto”e “Raidho, un viaje con vikingos”, novelas lidas polo alumnado de 1º e 2º de ESO.
Na exposición que a escritora fixo sobre Heka… contounos as motivacións que lle levaran a elexir un fondo histórico para este relato. Dado o seu interese pola cultura exipcia, matriculárase nun curso no Museo Exipcio de Barcelona que lle deu pé a elexir o tema da maxia ( heka ) para a historia de Víctor e Tutmosis.
Respecto a súa profesión, díxonos que estudara filoloxía catalana, e fora docente durante moitos anos, ó que interesou ós nenos e nenas por este oficio, traballo ao que a autora lle dedica todo o seu tempo na actualidade. De aí xurdiu a curiosidade de cómo se chega a ser escritora: lendo moito, investigando en múltiples fontes, recopilando os datos máis interesantes, redactando o argumento con paciencia, e sobre todo, corrixindo, corrixindo e corrixindo… pois un libro lévalle escribilo entre oito meses e un ano. E xa ten escritos uns corenta. Tamén nos falou dos personaxes que eran reais e cales imaxinados.
Sobre o final da historia, deunos unha explicación que nos interesaba moito a todos, profesorado e alumnado, pois nos parecera un final un pouco drástico e non demasiado claro. Contounos, entón, a razón deste ”continuarä…”: Heka forma parte dunha triloxía ( tamén Raidho ) na que poderemos entender por que Víctor, o protagonista, non volveu a casa e viviu novas aventuras noutras épocas e civilizacións, motivación máis que suficiente para que xa decidisemos ler no terceiro trimestre a historia vikinga vivida por Víctor na segunda novela..
Comentáronse, recordando situacións apreciadas no relato, os roles sociais desempeñados polas mulleres en Exipto que, con distintos ollos valoraba Víctor con respecto a Tutmosis, dado que as súas vidas estaban separadas no tempo uns dous mil anos...
Verificounos a autora, tamén, que os títulos de cada capítulo eran auténticos xeroglíficos traducidos. Estas e outras curiosidades animaron o coloquio, rematando as tres sesións coa decisión tomada entre todos de seguir lendo os libros de Núria Pradas.

Rematou asinando moreas de exemplares.


Crónica de Nones

16.3.12

Exposición "A novela policial"

A novela policial foi o tema do noso club de lectura durante este trimestre, e culminámolo cunha sesión o pasado luns arredor de Colleita vermella, de Dashiel Hammet, e coa colocación da exposición que estivemos preparando sobre o tema e que está dispoñible ata o día 16 de abril, día no que nos visitará Miguel Anxo Fernández. A exposición consta de 15 paneis (1oo cm X 70cm) e a través deles facemos un percorrido polas orixes da novela policial, damos algunhas claves para establecer as diferenzas entre novela de enigma e novela negra, apuntamos á intima relación co cine e a televisión e facemos un repaso dos principais autores e obras das distintas nacionalidades, incluíndo, por suposto, un panel para a novela policial galega. Dispoñemos ademais dunha guía de traballo para a visita dos grupos. Nestes momentos está sendo un éxito, e a parte dos grupos que xa a visitaron, cónstanos que o farán case todos os grupos do instituto. Agradecemos a colaboración do profesorado e os parabéns que nos levades dado.








Toloscontoscurtos e Versos Salgados

Ata o 12 de maio está aberto o prazo de presentación de orixinais para o II certame de contos curtos con retranca, "Toloscontoscurtos", e para o I certame de poesía "Saboroso Son dos Versos Salgados", convocados polo departamento de Galego. Podedes consultar as bases ampliando a imaxe ou ben nos carteis que están colocados polos corredores do insti. Ánimo e a participar!!!

2.3.12

Begoña Oro

O mércores día 29 visitounos a autora Begoña Oro. Tivo un encontro co alumnado de terceiro de ESO. O acto estivo organizado polas profesoras de lingua e literatura, Pili e Laura, que previamente traballaran nas aulas o libro "Pomelo y limón", gañador do premio Gran Angular. A obra, que gusta máis ás mozas que aos mozos, chamou a atención de parte do alumnado pola posibilidae que ofrece de interactuar cos blogs dos personaxes. Begoña Oro fixo unha exposición moi amena das posibilidades que ofrece o mundo editorial para a difusión do libro, e foi mostrando distintos formatos (papel con distintas portadas, readers, ipad...) para o mesmo libro e ilustrouno con continuos cambios de vestiario. Tamén charlou co alumnado sobre os blogs dos personaxes e as historias de amor, que ela pretende que sexan frescas (de aí o título) e nada empalagosas. Agradecemos a Begoña o esforzo de vir dende Zaragoza e compartir con nos esta sesión das que crean afición.

E o día 15, atención alumnado de primeiro ciclo, visitaranos Núria Pradas; e pouco despois Anxo Fariña. Á volta de vacacións visitaranos Miguel Anxo Fernández. Preparade ben os libros.





6.2.12

Día da Paz 2012

Como vimos facendo nos últimos anos, o día 30 tivemos unha sesión de vídeos pola Paz para o alumnado de primeiro de ESO. Agradecemos ao profesorado que previamente traballou o tema nas aulas e ao alumnado que se portou moi ben e aplaudiu cada vídeo. Parece que o vídeo final sobre Ana Frank fixo que picase a curiosidade e xa se levaron algúns exemplares da biblioteca. Esperamos que vos guste. (Perdón polas fotos tan oscuras)



23.1.12

Concursos matemáticos

Convócase o III Concurso de problemas matemáticos e II de relatos matemáticos. Coma no curso pasado, o concurso farase a través da aula virtual, para o que debedes inscribirvos. Podedes picar neste enlace para consultar as BASES