19.2.09

Olimpiada Matemática. Premio para Diego.

Pero, que pasa cos matemáticos deste instituto? Os días 6 e 7 de Febreiro de 2009 celebrouse na facultade de matemáticas de Santiago a fase galega da olimpiada matemática para bacharelato, donde o noso alumno DIEGO PÉREZ ESTÉVEZ foi un dos 9 gañadores da mesma, acadando un terceiro premio. Diego acudirá á fase final estatal que se celebrará en Girona, do 26 ao 29 de Marzo. Parabéns para Diego, que é un vello coñecido desta biblioteca, colaborando con diversas actividades en numerosas ocasións: o ano pasado gañou o concurso de postais de Nadal e foi un dos factotum da exposición sobre o LCH. Aquí tedes a foto de Diego recollendo un premio da biblio no curso pasado.

17.2.09

Libro do mes: Charlie e a fábrica de chocolate


Mozos e mozas de primeiro ciclo da ESO: non perdades a oportunidade de ler este fabuloso libro de Roald Dahl e conseguir máis bibliopuntos. Os bibliopuntos poden servir para gañar o premio deste mes ou para acumulalos e gañar o concurso anual. Non necesitades inscribirvos, só ledes o libro e acudides á biblioteca o día que se vos indique. O libro vaivos gustar, seguro. Ademáis podedes traer as vosas ilustracións sobre este libro, entragádeas na biblioteca no plazo dun mes e unha delas será a gañadora dun premio da biblioteca.

13.2.09

O noso Darwin

Co motivo do 200 aniversario do nacemento de Darwin, o alumnado de bioloxía de 4º, dirixidos polo departamento de Ciencias Naturais, estivo realizando un proxecto documental. Parte dese traballo é a exposición que dende onte está exposta polo instituto. Seguimos animando ao profesorado á realización de proxectos deste tipo, para os que sempre atoparán a colaboración e apoio da biblioteca. O resto do proxecto consta de diversas actividades: lecturas nas clases, debates e coloquios, xogos sobre a evolución, concurso de cartoons e o obradoiro "viaxe nun barco de vela pola Polinesia-Illas Galápagos-Illas Canarias-África Oriental-Australia", con recollida de información e elaboración de hipóteses.



9.2.09

Certame de Cartas de amor

Está en marcha o noso 4º Certame de Cartas de Amor. Entregade os orixinais na biblioteca. Por mor do temporal ampliamos o prazo de entrega ata o luns 16 de febreiro. Admítense cartas artísticas. Xa sabedes: Os gañadores, ademáis de ser publicados na revista "O besbello", recibirán un premio da biblioteca. Ánimo e a participar, aínda que este febreiro aínda non sexa nada primaveral.

6.2.09

Agustín Fernández Paz na biblioteca

Onte visitounos Agustín Fernández Paz , o recente Premio Nacional de Literatura Infantil e Xuvenil. Á sesión asistiron dous grupos de 1º de bacharelato, que prepararan na clase Corredores de Sombra, e máis os membros do club de lectura, que trataran na súa última reunión O único que queda é o amor. Agustín sorprendeunos poñéndonos para empezar música de The Clash, tan presente en Corredores de Sombra. Agustín falounos fundamentalmente da xénese das súas obras, de como a partir dalgún feito concreto nace unha idea que vai madurando pouco a pouco. Así, contounos como naceu Aire Negro a partir dun testamento que caíu nas súas mans, Corredores de Sombra a partir dun "conto mínimo" que despois se convertíu nun relato (Meditación ante o álbum de fotos familiar) que aparece en O único que queda é o amor. Quedámonos tamén coa fermosa historia da creación do personaxe de Skywalker. Agustín cedeulle a palabra ao alumnado, e foi aquí onde o club de lectura se mostrou participativo, plantexando diversas cuestións sobre a O único que queda é o amor . Sentimos que o alumnado de bacharelato non se mostrase igual de participativo (un pequeniño tóque de atención e autocrítica). Para a biblioteca e o club de lectura foi un Día Grande, un dos autores máis lidos e admirados por mozos, mozas e profes conversou con nós, falounos da constancia na lectura e no traballo, regalounos o texto do conto mínimo do que falamos antes e pediunos a guía de lecturas que tiñamos preparada para esta ocasión. Por suposto tamén tivo unha paciencia infinita para plasmar unhas fermosas sinaturas nos libros dos nosos alumnos.


2.2.09

Día da Paz 2009. Gaza esgazada.

O pasado venres, 30 de xaneiro, conmemoramos no instituto o día da Paz. Este ano, dende a biblioteca quixemos dar a nosa visión do que ocorre en Gaza. Fixemos sesións de proxección de 40 minutos, unha por cada nivel. A sesión para 1º ESO consistíu na proxección de vídeo-poemas e cancións-karaoke pola paz. Para os demais cursos preparamos un power-point titulado GAZA-ESGAZADA, tratando de establecer as relacións entre os conflitos que padecemos nas últimas décadas, patrocinados, case sempre polos mesmos actores. Ademáis proxectouse un vídeo do poeta palestino Mahmoud Darwish, con tradución ao galego, un da canción Palestina de Lluis Llach, tamén con tradución, a pequena reportaxe da nena palestina, os poemas en ruso e portugués gravados polas alumnas, Blowing in the wind con karaoke en inglés, a canción we can work it out interpretada pola israelí Noa e a Palestina Mira Awad e, para rematar Let the sunshine in, do musical Hair, con tradución ao galego en karaoke.
Ao principio de cada sesión leuse o manifesto colaborativo e o manifesto "O neno da biblioteca", dos compañeiros de Tui. Ao remate repartíronse as GUÍAS DE LECTURA POLA PAZ. Permanece na entrada do insti a exposición destes libros, así como os poemas pola paz que foron colgando nun taboleiro.


BubbleShare: Share photos - Play some Online Games.

1.2.09

O club de lectura na librería do barrio.

Como nos conta Piuzaky no blog do club de lectura, o luns pasado tivemos unha interesante e dinámica sesión do club de lectura. Ao remate da sesión decidimos que estaría ben poder ir todos á librería do barrio. Puxémonos en contacto co libreiro de Mendinho, a nosa librería de referencia, a máis cercana (1,6 km dende o insti) e pareceulle unha idea estupenda. Fomos andando nun día que amenazaba chuvia (aquí a amenaza cumpliuse)e recibiunos un libreiro vocacional, Argimiro. En primeiro lugar explicounos o funcionamento dunha librería. Falounos das dificultades das pequenas librerías no medio de tanta gran superficie, aconsellounos visitar algunha editorial (para ver outra parte do proceso). Despois tivemos (todo isto dentro dunha librería pequena)un pequeno debate do que sacamos unha conclusión: é importante que os barrios conten con locais deste tipo, lugares que están a man, a onde podemos ir botar unha ollada cando damos un paseo, do mesmo xeito que nos gustan as pequenas tendas ou as cafeterías do barrio. Alí dentro tamén nos puxemos ao día das novidades editoriais e deixámonos aconsellar sobre posibles lecturas do club para o futuro. Dende logo demos cun libreiro que ama os libros e que os coñece. Para a nosa sorpresa, antes de marchar deulle a cada membro do club un libro de agasallo.