Biblioteca IES Alexandre Bóveda

Concursos matemáticos

2012-01-23T09:51:00.008+01:00

Convócase o III Concurso de problemas matemáticos e II de relatos matemáticos. Coma no curso pasado, o concurso farase a través da aula virtual, para o que debedes inscribirvos. Podedes picar neste enlace para consultar as BASES

Lectura e Dereitos Humanos

2011-12-15T21:14:00.007+01:00

Durante esta semana e o que queda da próxima temos expostos no vestíbulo do insti as lecturas recomendadas sobre o tema dos Dereitos Humanos. Acompañamos esta expo de libros con un mural no que colocamos viñetas gráficas sobre o tema. A idea das viñetas déunola o amigo Ramón, do IES O Mosteirón, e nós mesturámola con recursos tomados das webs de Amnistía internacional e do Seminario Galego de Educación para a Paz. Aproveitamos para expoñer tamén os twits e postais premiadas no concurso do Día contra a Violencia de Xénero.

No centenario de Cunqueiro

2011-12-10T11:28:00.011+01:00

Despois de traballalo nas clases de literatura galega e de trafegar con todos os libros de Cunqueiro que había na biblioteca, o alumnado de 1º B e 2º E de Bacharelato visitaron o día 29 de novembro a exposición que sobre a vida e a obra de Álvaro Cunqueiro organiza a Editorial Galaxia e a Fundación Penzol na Casa da Cultura Galega de Vigo.

Foron recibidos por Francisco Domínguez, Director da Fundación Penzol, e presenciaron unha presentación en Power Point da historia da propia Fundación e das persoas que contribuíron coa doazón do seu patrimonio bibliográfico e artístico, e co seu esforzo e iniciativa, a dotar os fondos do gran centro de documentación sociolóxica e historiográfica que é hoxe en día a Fundación. Escoitaron falar de Paco Del Riego, de Fermín Penzol, de Ramón Piñeiro, de Xaime Isla e doutros membros do Padroado que fixeron posible que hoxe os galegos poidan pescudar sobre o seu pasado e o seu presente.

Despois de ver os diferentes paneis da Exposición e de familiarizarse coa obra e vida de don Álvaro, o seu fillo César falou do pai desde a perspectiva dos sus anos de infancia en Mondoñedo e da súa aprendizaxe á beira dun home que lle transmitiu o amor por dúas linguas que saben a pan e que converteron a Álvaro Cunqueiro no maior fabulador que deu a literatura nos anos en que só existía o neorrealismo de posguerra.

Despois de diversas preguntas, alumnos e alumnas do Alexandre Bóveda procederon a recitar seis poemas dos diferentes poemarios de Cunqueiro e concluíron coa interpretación do poema que lle dá nome á exposición No niño novo do vento, unha interpretación chea de gusto na que participaron Berenice como intérprete e un grupo de músicos de 2º E (Artes Escénicas) que acompañaron cunha adaptación da música de José Emilio Batallán

Foi unha xornada chea de emoción moi aproveitable na que o alumnado conseguiu introducirse esplendidamente no mundo máxico do Cunqueiro poeta, narrador e dramaturgo.

Crónica de Antón.

Deixamos aquí o vídeo da súa interpretación. Podedes ver máis vídeos desta visita no blog de tecnoloxía.

PREMIO NACIONAL DE BOAS PRÁCTICAS

2011-12-01T20:09:00.005+01:00

Hoxe comunicáronnos a boa nova. A nosa biblioteca acadou un terceiro premio no Concurso Nacional de Boas Prácticas en Bibliotecas Escolares. É un premio para o noso centro, pola labor desenvolvida nestes últimos anos, polo que desde a biblio queremos agradecer o traballo das persoas do equipo, o das persoas que estiveron e das que están, o do profesorado que dun xeito ou doutro participou e participa das actividades que propoñemos. Pero o máis importante é que este é un premio para os alumnos e alumnas que fixeron o camiño con nós, que foron e son a nosa motivación máis importante. Non queremos esquecer a todos os compañeiros e compañeiras do Plan de Mellora de Bibliotecas Escolares de Galicia, sen cuxas ideas, colaboración e solidariedade sería imposible facer este traballo. Parabéns para as outras cinco bibliotecas escolares galegas premiadas. Deixamos para o final a mención ao equipo directivo que sempre apoiou as nosas iniciativas. E Cristina, Pilar... sobran as palabras.

Esperamos que este sexa o comezo.

Día da Ciencia en Galego

2011-11-08T09:28:00.002+01:00

O alumnado de 1º e 3º ESO estivo a traballar nas aulas sobre as figuras da galega María Wonenburger e de Marie Curie. Froito da información recollida, acabaron realizando uns murais que están expostos desde o día 4, Día da Ciencia en Galego.

Actividades contra a violencia de xénero

2011-11-02T11:41:00.007+01:00

Dedicamos o mes de novembro ás actividades contra a violencia de xénero. Nos próximo días poderedes ver polos corredores uns carteis coma os da imaxe, preparados para que poidades escribir neles unha pequena declaración a favor da convivencia. Por outra banda convócase un concurso de postais ilustradas e con lema, en galego, a favor da tolerancia, o respecto e a convivencia. Tamén se convoca un concurso de twit-relatos en galego (máximo 140 caracteres) baixo os mesmos lemas que o concurso de postais.
Podedes ler as bases dos concursos nos carteis que hai polo instituto.

As postais e os twit-relatos haberá que entregalos na bibliobóveda antes do día 25 de novembro, día no que celebraremos unha sesión de vídeos contra a violencia.

As Bibliotecas Escolares Galegas despedimos a María Dolores

2011-09-15T10:52:00.014+02:00

Comezamos o curso con tristeza. Temos que despedir á compañeira Mª Dolores Martínez Tobío, docente no IES Luis Seoane de Pontevedra e responsable da biblioteca escolar do centro. Hai só uns meses que Mª Dolores nos puxo a Salvar Libros por centros de toda Galicia. Salvar os libros que valen a pena, as linguas nas que se escriben eses libros, as bibliotecas nas que se gardan... a memoria dunha mestra que día a día traballou a favor da cultura e a educación.
Este é un documento colaborativo como tantos outros nos que Mª Dolores adoitaba participar co seu habitual entusiasmo. Desgraciadamente convocounos hoxe a súa despedida e pensamos nesta pequena homenaxe que xorde da mesma rede que ela axudou a tecer. Canto tempo e ilusión dedicados a Biblioiris, a súa bitácora vinculada á biblioteca escolar do instituto! Por iso os nosos blogs lamentan hoxe a súa ausencia. Por iso esta entrada será publicada por moitos outros centros, ademais dos que aquí figuran. Esperamos que este documento saiba representar tamén a tantas persoas que, desde a rede PLAMBE das bibliotecas escolares galegas, desexan expresar o seu pesar e as súas condolencias á familia e amigos da nosa compañeira. Son tantos os centros que a súa relación excede as dimensións deste documento.

Grazas Mª Dolores polas palabras, polas reflexións, polas propostas, polo tempo, polo que fixemos xuntos e que permitirá seguir camiñando pola ruta das bibliotecas escolares
Cristina Novoa
Pilar Sampedro
Asesoría Bibliotecas Escolares

Imaxe das ligazóns: Rapaza lendo. Gustav Adolf Hennig

Os xornais de 3º A

2011-06-14T10:07:00.010+02:00

Vanakkam. Benvidas. Con Salma na biblioteca.

2011-06-13T09:17:00.004+02:00

O xoves 2 de xuño, nunha sesión co alumnado de antropoloxía e noutra cos de ética de 4º, visitounos a escritora de Támil Nadu (India) Salma. María Reimóndez acompañouna e fixo de intérprete. O alumnado preparara nas clases algúns poemas do libro Benvidas, unha selección de poemas de distintas autoras e co patricinio da ONG Implicad@s no Desenvolvemento, poemario no que tamén participa Salma. Falounos Salma das dificultades de ser feminista na India, e aínda máis, de ser musulmá e escritora feminista. Contounos como pasou de ter que escribir a escondidas da súa propia familia ata ocupar un carg o político (directora xeral de asuntos sociais do seu estado, o que aquí sería equivalente a ministra) nunha rexión que case duplica en habitantes a España, tendo que soportar ataques por tratar abertamente a sexualidade feminina nas súas obras. As preguntas do alumnado non xiraron arredor das cousas típicas que poderían preguntar ante unha escritora procedente dun lugar tan afastado física e culturalmente, antes ben interesáronse polas circunstancias sociais, pola educación, pola influencia da relixión, polos avances na mellora da situación da muller…

Recital poético-musical das Letras Galegas

2011-06-01T18:41:00.009+02:00

A maioría viña de fóra do instituto, do noso instituto. Viñan do conservatorio, de vivir o 1 º de bacharelato só entre eles, “os do musical”, e rexeitaban o novo centro e a posibilidade (e necesidade) de convivir con outros rapaces e rapazas, da súa idade si, pero de intereses e actitudes totalmente alleos.
Eles, mesmo aquí, ao seu: tocaban os instrumentos nas festas, nos recreos e mesmo entre clase e clase. Parecían vivir illados. Pero a vida e o tempo demostraron que a convivencia nos fai máis tolerantes e eles e elas tamén se abriron (e mesmo ligaron) cos outros.
Parabéns.
E entón, a estes e estas estudantes de segundo de bacharelato de Artes Escénicas, Musicais e Danza propúxoselles facer un recital poético como remate de curso, onde puidesen demostrar esas habilidades case consubstanciais con eles (algúns parece que mesmo teñen a guitarra como apéndice do seu corpo de tanto que anda con ela; outras, non se entende como con ese corpiño tan pequeno poden cargar con tal acordeón… pero, ai!, como o toca!).
E puxéronse á obra alá polo mes de febreiro: elixiron o poema co que máis se identificaban de entre varios e, a partir de aí, viron a maneira de escenificalo, seleccionaron (e mesmo crearon) a melodía que mellor lle acaía… e ensaiaban e ensaiaban cunha dedicación e un estusiasmo digna dos mellores artistas.
Pero saíulles ben, moi ben. Porque, tal e como se demostrou nun salón de actos abarrotado de alumnos e alumnas de 2º de bacharelato e de 1º de Artes Escénicas, e de todo o profesorado que asistiu, o espectáculo foi un éxito.
A combinación de recitado e de poema cantado (marabillosas María cantando “Lela” e Lucía, “Negra sombra”), de música (fantásticos, fantásticos,…) e danza (delicadeza, cadencia,…) entusiasmou aos presentes.
Recén chegados si, pero cunha pegada formidable.
Mil grazas. E parabéns unha vez máis.
Podedes consultar neste documento o programa cos nomes dos artistas e a letra dos poemas que interpretaron

A INSOPORTABLE LEVEDADE DAS BIBLIOTECAS ESCOLARES GALEGAS

2011-06-01T08:40:00.004+02:00

Ante a previsible retirada de formadores específicos no ámbito das bibliotecas escolares no Servizo de Formación do Profesorado, no Centro Autonómico de Formación e Innovación e nos centros de formación e recursos dependentes da Dirección Xeral de Educación, Formación Profesional e Innovación Educativa, segundo o borrador da orde que convocará concurso público de méritos para cubrir postos de persoas directoras e asesoras nestes centros queremos manifestar o seguinte:

Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente de persoas que senten que é posible compartir e facer viable o proxecto xuntos. Así naceu o movemento que cristalizou na iniciativa que todos coñecemos como PLAMBE. De xeito que dende hai algúns anos, esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. Os numerosos e constantes premios anuais de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta.

Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal. Onde quedou ese entusiamo? Que interpretación debemos facer? O noso país pode permitirse tirar pola borda todo este traballo? E nós?. En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?.

Colectivo dos equipos das bibliotecas escolares integradas no PLAMBE (Plan de Mellora das Bibliotecas Escolares Galegas).

Suscrito polo Equipo de Biblioteca e Dirección do IES Alexandre Bóveda.

Proxecto Exipto e Olimpíada do Saber.

2011-05-25T20:06:00.011+02:00

Desde esta semana temos expostos os materiais do proxecto de centro, sobre o antigo Exipto. Non todo o que se fixo foi para a expo, pois moitos materiais fixeronse en power point e word. Partciparon distintos grupos de ESO e bacharelato con profesores de matemáticas, música, plástica, inglés, lingua castelá, lingua galega, historia, economía e latín. Non estivo mal para ser o primeiro ano. Para inugurar a exposición, o alumnado do bacharelato de artes escénicas e musical prepararon uns bailes "exipcios" dos que deixamos vídeo.
Por outra banda, comezou a Olimpíada do Saber, co mesmo tema, Exipto, con 24 participantes a través da aula virtual.

Semana das Letras Galegas

2011-05-19T20:46:00.008+02:00

Coma tódolos anos, celebramos as Letras Galegas con varios actos. O primeiro deles foi un festival de música e poesía, a cargo do alumnado de 2º bach. de artes escénicas. Nun post posterior poremos o vídeo deste festival, xa que aínda está na fase de maquetado. Xunto co vídeo explicaremos en que consistiu.

Na biblioteca, o día 19, celebramos as lecturas públicas. Durante dúas horas distintos grupos acudiron á biblioteca onde foron lendo textos de Lois Pereiro e de Álvaro Cunqueiro. Tamén fomos intercalando os vídeos que fixerón as compañeiras do IES Concepción Arenal.
Ao finalizar entregamos os premios dos certames de Vídeo (a Inés e Marta) e de ilustración ( a Noa). E, como non, houbo festa rachada no remate, co noso grupo de cantareiras, pandereteiras e gaiteiros. Podédelo ver nas fotos e no vídeo que siguen.

LETRAS GALEGAS: O ANO DE LOIS PEREIRO

2011-05-18T18:11:00.009+02:00

Reproducimos integramente aquí, co permiso das autoras, o traballo que sobre Lois Pereiro fixeron dende a biblioteca escolar Saturnino Hermida, do IES Concepción Arenal de Ferrol.

"Como dixo Manolo Rivas, na obra de Lois Pereiro, máis que na de ningún outro poeta galego,o amor e a morte, Eros e Thánatos, van da man.
Poesía dunha intensidade poco común, é facil lembrar moitos dos versos de Lois, quedan impresos na memoria porque son versos de francotirador,van directos ao corazón e penetran nel, pola verdade do sentimento que transmiten, pola forza e expresividade das súas imaxes.
Un poeta fondo, emocionante, para lelo devagar e revisitalo a miúdo."

E para coñecelo mellor, podedes ver o powerpoint feito por Elvira Roiz, aconsellada por Inés. A presentación que aparece aquí é a introducción, para ver as restantes partes premede nas ligazóns.
LoisPereiro1_Intro

View more presentations or Upload your own.

MONFORTE, MADRID, CORUÑA 1, CORUÑA 2

Xosé Monteagudo na biblioteca

2011-05-06T20:40:00.003+02:00

Esta é a crónica que nos fixo Fonso sobre a sesión:
O pasado 29 de abril, sexta feira, visitou a nosa biblioteca o escritor morañés Xosé Monteagudo para nos falar da súa última novela Un tipo listo, que recibiu o premio García Barros 2009 e está publicada por Galaxia.
Comezou a charla ás 12.30 coa asistencia duns cincuenta alumnos de 1º de Bacharelato e algúns profesores. Dous alumnos, Yeray e Martina, fixeron unha brillante e breve presentación. Xosé Monteagudo, pouco acostumado aínda a lidar nestes sarillos, principiou a súa intervención dicindo que a súa carreira de escritor comezou hai poucos anos, uns dez, e que investía unha media de tres anos en cada novela. Fixo un rápido repaso á súa produción e uns quince minutos despois abriu a quenda de preguntas.
O alumnado seguiu con moito interese as palabras do autor e fixo preguntas durante máis dunha hora. Como escolle os nomes dos personaxes? Como decide o título do libro? Por que este libro se titula Un tipo listo? Por que todos os capítulos comezan por un concepto económico? É difícil pórse na pel dos personaxes antipáticos? Foi divertido crear a trama da brasileira Mireia da Costa? Escribir é un traballo ou un pasatempo? Comeza a escribir sabendo como se vai desenvolver a acción ou, a medida que vai escribindo, van xurdindo novos aspectos? Que escritores admiras?(...)
Xosé Monteagudo comentou, entre outras cousas, que escolleu ese título pola súa ambigüidade: un tipo listo, en sentido irónico, pode ser calquera dos tres protagonistas principais. Di que, para el, escribir non é un pasatempo, é un traballo, pois todos os días e de forma sistemática e disciplinada, escribe polo menos tres ou catro follas. Asegura que non cre na inspiración, aínda que neste libro tivo algo parecido a iso cando escribiu un dos capítulos, "era coma se mo ditasen". Ademais, cando escribe unha novela o único que sabe é o tema e cara a onde quere levar os acontecementos. Mais, as tramas ou accións intermedias son tamén unha sorpresa para el, pois a propia novela e os personaxes obrigan a tomar determinados camiños. Finalmente, os autores dos que máis gusta son os grandes escritores sudamenricanos como Borges ou Cortázar, o estadounidense Paul Auster (máis nos seus primeiros libros) e o xaponés Haruki Murakami, entre moitos outros.
A iso das dúas da tarde, con catro ou cinco mans levantadas, tivemos que cortar as preguntas para que o autor asinase os libros ao alumnado. Aínda se alongou un pouco máis o debate, agora xa de xeito menos formal.
En resumo, Xosé Monteagudo cativounos, antes de coñecelo persoalmente, pola súa gran novela sobre a corrupción económica e inmobiliaria que narra Un tipo listo e logo, na súa charla, pola súa sinxeleza, cercanía e boa onda que demostrou con todos.
Moitas grazas, Xosé.

Boas Prácticas

2011-05-05T09:44:00.007+02:00

Desde o portal leer.es, do Ministerio de Educación, comunícannos a concesión do selo "buenas prácticas de lectura", en recoñecemento á integración das matemáticas e a lectura. Un recoñecemento para a biblioteca, para o departamento de Matemáticas e para o proxecto lector de centro.
Pódese ver en http://leer.es/buenas-practicas/ e en http://networkedblogs.com/hthNr.

A edición en galego baixo a censura franquista

2011-04-28T19:18:00.009+02:00

Para commemorar este mes dos libros montamos esta exposición sobre a censura, titulada "Editar en galego baixo a censura franquista". Desde principios de curso tiñamos proxectado facer algo sobre este tema, e a ocasión veu da man da editorial Galaxia, que nos cedeu os paneis da exposición sobre a que se vai traballar nestas semanas. Seis paneis informativos acompañados de portadas de libros e das notas dos censores. Os comentarios non teñen desperdicio. Dende a biblioteca elaboramos un pequeno cuestionario de traballo para os grupos que visitan a exposición. Disfrutádea, que despois desta virá a exposición dos materiais do proxecto interdisciplinar.

INVESTIGACIÓN SOBRE A MITOSE

2011-04-07T10:34:00.004+02:00

Ao longo do segundo trimestre, os alumnos de bioloxía de 4º A/B realizaron un pequeno traballo de investigación sobre a mitose, no que finalmente cada grupo tiña que facer a súa representación gráfica, marcando con distintos materiais a diferenza entre os cromosomas, cromátidas e cromatina. A parte do traballo debusca de información, desta vez queremos destacar a orixinalidade da presentación, na que nada está debuxado, senón feito con materiais como macarróns, fíos, muelles, plastilina... un chisquiño de orixinalidade.

O resultado foi este:

3º ESO A GAÑADORES DO “RALLYE MATEMÁTICO 2011”

2011-04-06T19:37:00.009+02:00

Os alumnos e alumnas do curso de 3º ESO A foron os gañadores galegos do XIX RALLYE MATEMÁTICO celebrado o 21 de Marzo do 2011.

PARABÉNS para todos eles.

Os 20 alumnos de 3º ESO A demostraron, unha vez máis, as súas habilidades no eido das Matemáticas. Cos seus amplos coñecementos matemáticos, o seu sentido organizativo, a súa perseverancia, a súa infinita ilusión conseguiron ser os mellores dunha cuarentena de grupos de toda Galicia que coma eles querían ser os primeiros. Este concurso caracterízase por ser unha competición matemática en grupo. A os 70 grupos que participaron este ano no Rallye propúsoselles 5 exercicios para resolver nunha hora. Todos os grupos, o mesmo dia a mesma hora, e vixiados por profesores doutro Centro, fixeron a mesma proba ( 4 exercicios comúns e o quinto específico para 3º ESO ou 4ª ESO), pero cada grupo no seu Centro .

O resultado final xa o coñecedes: 1º premio 3ºA do IES Alexandre Bóveda de Vigo

Despois desta gran alegría para o Centro, para o Departamento de Matemáticas e sobre todo para estes 20 alumnos aínda nos agardan máis satisfaccións: os premios. O primeiro paso é unha viaxe a Santiago de Compostela onde representantes da administración educativa farán entrega de Diplomas e de algúns presentes (non moitos pola crise) aos alumnos gañadores. O premio importante consiste nun desembolso monetario para o gasto do traslado a Toulousse dos gañadores de 3º e 4º de ESO a finais de maio. Unha vez alí estos grupos representarán a Galicia na final do Rallye Matemático de Toulousse.

Moita sorte 3º ESO A e a seguires traballando tan ben como ata agora.

A profesora Rosalía Fernández, que preparou ao grupo para esta proba, fíxonos esta crónica. Desde a biblioteca unímonos aos parabéns para 3º A.

Conferencia matemática

2011-03-31T10:18:00.008+02:00

O martes 29 de marzo estivo no noso centro a decana da facultade de matemáticas da universidade de Santiago, a profesora Mª Victoria Otero Espinar, impartindo unha conferencia titulada “As matemáticas na vida cotián”. Foron dúas sesións de 50 minutos, unha para o alumnado de 4º de ESO e outra para o alumnado de 1º de bacharelato, onde a decana fixo unha exposición moi amena na que mostrou ao alumnado (e ao profesorado que asistiu tamén) distintas aplicacións das matemáticas en varios campos (medicina, odontoloxía, xeografía,ciencias socias, tecnoloxía…), curiosidades sobre os sistemas de numeración, representación de gráficas estatísticas con “trampa” ou inadecuadas, a presenza de figuras xeométricas na natureza e, nalgúns casos, o por que destas formas… Non deixou de comentar tamén algún casos de estudios matemáticos carentes de sentido.

O acto servíu como remate a unha serie de actividades do departamento de matemáticas, e nel entregáronse os premios aos participantes nos concursos de relato matemático e de resolución de problemas.

O alumnado nesta ocasón estivo moi atento, debido a amenidade, interese e boa exposición da conferenciante, á que voltamos a reiterarlle o noso agradecemento.

Día da poesía en portugués.

2011-03-25T12:07:00.020+01:00

Como tódolos anos, non quixemos deixar a ocasión de traballar a poesía, aínda que cuns días de retraso por mor das avaliacións.

Organizamos un recital de poesía portuguesa a cargo do profesor do centro Ricardo Álvarez. Non foi un recital ao uso, senón unha interpretación magnífica de poesías que incitan á reflexión. O idioma non foi obstáculo e todo o alumnado de 2º bach., aos que estivo dirixido o acto, comprendeu perfectamente a nosa lingua irmá e aplaudiron todas e cada unha das poesías, seleccionadas para chegar directamente ao centro das conciencias e sacudilas un pouco.

Foi, sen dúbida, un acto extraordinario, que non deixou a ninguén indiferente, e esta vez non só felicitou ao noso actor o alumnado, senón que tamén o profesorado o fixo con entusiasmo. Repetiremos o acto para outros grupos durante este curso, pois quedou demostrado que a poesía pode chegar a todo o mundo e non debe ser só un acto de lectura na intimidade. A interpretación fíxose con poemas dos seguintes autores:

José Gomes Ferreira

Ana Hatherly

Adília Lopes

José Galhardo

Jorge de Sousa Braga

Daniel Maia-Pinto Rodrigues

Reinaldo Ferreira

Mario Cesariny

José Luis Barreto Guimaraês

Alberto Pementa.

José Carlos Ary dos Santos

Fernando Pessoa

Álvaro de Campos

Rematou cunhas propinas multilíngües de Cesare Pavesse, Dasso Saldivar, Guido D'Arezzo e Mahmud Darwish.

Ilustración gañadora

2011-03-14T10:45:00.003+01:00

Durante o mes pasado, como actividade complementaria á exposición de álbum e libro ilustrado, tivemos convocado un concurso para ilustrar o conto de Carlos Casares "A rapaza do circo". A gañadora foi Noa Covelo, que fixo un extraordinario traballo cheo de arte e sensibilidade. Co beneplácito da editorial publicamos a versión en issuu do conto ilustrado por Noa. A nós xa nos pagou a pena.

Open publication - Free publishing - More educacion

Xabier Docampo cos clubs de lectura

2011-03-10T22:45:00.003+01:00

Sesión extraordinaria dos rapaces e rapazas do club de lectura, poñendo un broche dourado ao que ían ser dúas semanas de actos sobre o libro ilustrado e se convertiron en tres por petición popular. Falou Xabier Docampo dos libros Cando petan na porta pola noite e O pazo baleiro, pero ante todo falou de literatura e de lectura. Para el, e para nós, non hai camiño de formación máis libre e máis democrático que a lectura, que contén todos os modelos que nos ensinan a comprender o mundo cada vez mellor. Tal vez a lectura non nos faga máis listos, pero cada libro que perdemos fainos perder a oportunidade de selo. A lectura é polo tanto un camiño de busca persoal, onde podemos atopar aquilo que di de nós. Convértese nun dos actos de rebeldía máis grandes que se poden facer hoxe en día. Parafraseu Xabier a Woody Allen para afirmar que somos o resultado das decisións que tomamos ao longo da vida, e seguiu a mesma liña argumental cando no turno de preguntas dixo que os seus libros non eran de medo, senón de misterio, sobre a incapacidade do ser humano de chegar ao coñecemento total.
Polo prolongado do turno de preguntas e do coloquio podemos asegurar que calou fondo o autor no alumnado, ao que desta vez si que felicitamos pola súa participación e receptividade. Ao final vai ser certo iso de que a lectura nos fai máis libres e democráticos. Agradecémoslle profundamente a Xabier ese coloquio amistoso co alumnado ao que deixou con ganas de ler aínda máis.

A edición de álbum ilustrado con Francisco Castro

2011-02-28T09:31:00.002+01:00

O pasado 21, dentro dos actos sobre o libro ilustrado, visitounos Francisco Castro, esta vez na súa faceta de editor, para dar unha charla sobre a edición do álbum ilustrado e a edición dixital. A charla, dirixida ao alumnado de primeiro bach. foi moi amena e didáctica. Francisco contounos todas as fases e actores que interveñen na edición dun álbum e falounos do futuro da edición dixital facendo demostracións cun ipad, algo que chamou moito a atención. Coma sempre, agradecemos a Fran a súa disposición e sobre todo a súa paciencia, pois, sendo sinceros, non todo o alumnado correspondeu ao seu didactismo e bo facer coa educación que o acto merecía.

Carlos Negro co club de lectura

2011-02-20T11:59:00.007+01:00

O venres visitounos Carlos Negro. Foi unha sesión co club de lectura e co grupo 3ºA que prepararan o libro Makinaria nas clases de galego. Con Carlos soubemos do valor da palabra escrita, pero sobre todo do valor da palabra pronunciada. Emocionounos, fíxonos partícipes dos seus versos, regalounos un conto e uns versos para cada un, que nos fixo ler en público. De momento, á espera da crónica que esta facendo Yago para o blog do club de lectura e que terá lista para a próxima semana, deixamos aquí as fotos dunha sesión que tardaremos tempo en esquecer. Agradecémoslle a Carlos a visita e o bo facer e complicidade que tivo co noso alumnado. Unha sesión recomendable para todo o mundo.

Quincena da ilustración e visita de Anxo Fariña.

2011-02-08T17:23:00.011+01:00

A partir de hoxe, na biblioteca podedes ver a exposición sobre a ilustración e ilustradores en Galicia. Coa colaboración de diversas editoriais que nos prestan os libros, montamos unha expo na biblioteca con máis de cen libros e álbums ilustrados. Acompáñana 38 cadros cadros con ilustracións orixinais cedidos pola editorial Xerais, 10 pósters elaborados por nós con información sobre as editoriais galegas, unha escolma de ilustradores actuais (non están todos, pero todos o son), unha guía didáctica para traballar nas visitas e un cartel con información sobre as saídas laborais que ofrece o mundo editorial.

Convocamos tamén un concurso de ilustración do mes dos namorados, titulado "Ilústrame este conto", no que deberán realizar unha ilustración a partir do conto "A rapaza do circo", do libro de Carlos Casares Vento ferido.

A exposición tamén se traballa nas clases, así, o alumnado de primeiro ESO e do club de lectura leu "Os Megatoxos" e onte, luns, disfrutaron dun taller de ilustración co autor da obra, Anxo Fariña, que fixo as delicias do alumnado (sobre todo dun, ao que transformou en personaxe). A participación foi moi activa, e case todos realizaron algún debuxo, do que damos fe nas fotos, con máis gloria que pena. Ao rematar asinou os libros do alumnado.

O alumnado de primeiro bach. terá unha sesión co escritor-editor Francisco Castro, que versará sobre a edición do libro ilustrado e as novas formas de edición. Recibiremos tamén nesta quincena, as visitas de Carlos Negro e Xabier P. Docampo.

As fotos están un pouco escuras, para que o flash non causase reflexos. (A verdade é que a fotografía non é o noso, así que se valorará facer fotos novas)

Teatro en inglés

2011-02-04T19:02:00.007+01:00

Aínda que cun pouco de retraso, subimos as fotos da obra de teatro en inglés que tivo lugar a semana pasada. A obra, School's Out, representada polo grupo Clever paints e destinada a terceiro e cuarto, enmárcase dentro das actividades do plan anual de lectura do departamento de inglés, que xa con anterioridade organizara un contacontos en inglés para bacharelato a cargo de Charo Pita e Tim Bowley. O alumnado pasouno ben e incluso tivo ocasión de participar.

Novidades de febreiro

2011-02-02T11:27:00.004+01:00

Presentamos as novidades en castelán do mes de febreiro neste espazo, posto que non temos dispoñible o expositor de novidades que estará ocupado coa exposición que se inaugurará nun par de días e da que daremos noticia.

Miguel Hernández no traballo diario

2011-01-19T19:24:00.003+01:00

Como en case todos os centros, no noso insti tamén se realizaron diversas actividades arredor do centenario do poeta de Orihuela. En colaboración coa biblioteca, o departamento de Lingua traballou na elaboración de collages e carteis cos poemas nos cursos de 1º e 4º ESO. O alumnado de 3º participou nun taller de "escritura medieval" e fixeron as prácticas con poemas do autor. Este traballo fíxose ao longo do primeiro trimestre e o resultado está agora exposto. Tamén se organizou un recital de poemas do autor en dúas sesións para 4º e bacharelato a cargo do trobador Francisco Gómiz.

Na biblioteca elaboramos unha webquest no entorno da aula virtual coa que actualmente está traballando o alumnado de 4º.

CONCURSO MATEMÁTICO

2011-01-19T17:40:00.007+01:00

Un ano máis e ao abeiro do plan anual de lectura do departamento de matemáticas, ponse en marcha o II Concurso Matemático, este ano cunha interesante novidade: ao exitoso concurso de resolución de problemas matemáticos únese un concurso de relato matemático. O alumnado deberá resolver problemas que requeriran a lectura previa de enunciados longos, pero tamén poderán inventar o seu propio relato ou enunciado a modo de relato. Este ano introducimos ademais a posibilidade de entregar as solucións a través da aula virtual. Podedes ler aquí as BASES DO CONCURSO. As preguntas, nas datas que se establecen nas bases, colgaranse na web do insti, na aula virtual e máis neste blog. Estade atentos.

Deixamos aquí algúns dos carteis que podedes ver polo insti adiante.

Traballando polos Dereitos Humanos

2010-12-23T13:50:00.007+01:00

Dende o día 10 de decembro, como dixemos nun post anterior, tivemos unha exposición polos corredores sobre os dereitos humanos. Invitouse ao profesorado a participar, para o cal editamos unha guía de traballo cun cuestionario que podedes descargar. Ao longo destes días algúns grupos visitaron a exposición e realizaron as clases nos corredores buscando información para cubrir o cuestionario. Participaron cos seus grupos (desde 1º ESO ata 2º Bach.) profesores de galego, castelán, historia, matemáticas, relixión e os grupos de diversificación. Para nós foi todo un éxito e indicounos unha liña a seguir cada vez que fagamos unha exposición. Deixamos as fotos dalgúns cursos aos que pillamos in fraganti.

Vídeo gañador do certame da biblioteca

2010-12-21T19:44:00.004+01:00

Velaí vai o vídeo gañador do certame de vídeo "Re-visualiza a túa cidade" que se convocou ao comezar o trimestre. Aínda que a participación foi baixa, ao ver a calidade do vídeo gañador, realizado por Inés e Marta, seguro que para o próximo subirá a participación. En só tres minutos dannos unha idea bastante precisa do feísmo urbanístico sen perder o sentido de humor, tal como se reflicte nos créditos, que hai que ver ata o final.

Con Francisco Castro no Día dos Dereitos humanos.

2010-12-10T18:25:00.004+01:00

Hoxe tivemos unhas cuantas actividades no instituto con motivo do día dos Dereitos Humanos. Comezamos a primeira hora coas patrullas lectoras, un retén de garda do club de lectura foi polas clases de primeiro lendo poemas de Celso Emilio e Miguel Hernández. Ao longo de toda a mañán (e estará uns días) puidose visitar unha exposición con texto e debuxo sobre os dereitos humanos. Este material é de Amnistía Internacional. Nós pasámolo ao galego e elaboramos un cuestionario de traballo para o profesorado que queira visitar e traballar a exposición co seu alumnado (algúns xa o fixeron hoxe). Acompañamos todo isto cunha exposición de libros no vestíbulo.

O acto central foi a visita do escritor de máis éxito no noso instituto, Francisco Castro, que veu falarlles aos de 2º ESO sobre o seu libro "Un bosque cheo de faias", que previamente traballaron nas clases de galego e que é moi acaido para falar de dereitos humanos: falouse sobre todo da discriminación racial e da discriminación por razón de sexo ou relixión. A pesar de que se explicou o significado do título do libro (polo campo de concentración de Buchenwald), houbo algunha intervención interesante do alumnado á hora facer as súas propias interpretacións(considerando as faias como unha árbore autóctona e o bosque como unha cidade).

Dámoslle dende aquí de novo as grazas a Francisco, que fixo un esforzo por estar connosco e saír pitando para intervir no Foro Compostela.

Contra a violencia de xénero

2010-11-25T20:18:00.004+01:00

Hoxe, 25 de novembro, como xa é tradición, realizamos diversas actividades para concienciar ao alumnado contra esta lacra social. Fixemos unha sesión de vídeos contra a violencia para o alumnado de 1º bach. con música, curtas e recomendacións de libros. Tamén realizamos un cartel cos libros que temos na biblioteca sobre o tema e fixemos unha exposición de libros no vestíbulo.

Por outra banda, onte o un grupo de 1º bach. D recibiu o 1º premio no I certame de microvídeos NON O IGNORES, NON O XUSTIFIQUES, NON O ESCONDAS. Pódedes ver o vídeo neste enlace ao blog de tecnoloxía.

Con Mario Pereira na biblioteca

2010-11-19T19:31:00.007+01:00

Hoxe estivo co alumnado de 1º ESO Mario Pereira, para falarnos do libro Contos para Manuela, que tiñan ben preparado nas clases de galego. O amigo Mario axiña conectou con eles e falounos de como algúns acontecementos que lle ocorreron a el deron pé a creación dun conto. Explicounos algunhas experiencias vitais que aparecen reflectidas neles. Pero cecais foi máis interesante o amplísimo turno de preguntas, no que houbo unha gran participación. Algúns tamén trouxeron escritos finais alternativos para os contos e léronos en público, cousa que ao autor lle agradou moito e correspondeu lendo o principio dun conto inédito, facendolle as ganas ao ouditorio, que espera a saída á luz da versión completa. Despois dunha agradabilísima hora e media houbo que parar para que Mario puidese asinar a chea de exemplares que traían. Agradecemos a este amigo lector-autor a súa presenza, agardando que remate ese conto que seguro leremos con atención.

Concurso de reportaxes

2010-10-05T18:30:00.005+02:00

Iniciamos as actividades da biblioteca coa posta en marcha dun concurso de reportaxes periodísticas sobre a nosa cidade, destinado a 4º e bacharelato. Este trimestre propoñemos dous temas, para escoller un: o feísmo urbanístico e a humanización da cidade. Animadevos a participar. Podedes consultar no enlace para ver o CARTEL COAS BASES DO CONCURSO

Representación de "O achado do Castro"

2010-06-24T19:00:00.006+02:00

Por segundo ano consecutivo, os mozos e mozas do club de lectura representaron esta obra de Manuel Núñez Singala. Fixeron tres representacións para que puidesen vela todos os grupos de ESO. Tivemos a participación dos ex alumnos David e Pablo, que seguiron vindo ás sesións do club e ademais o último fixo de director na maioría dos ensaios.Agradecemos tamén a colaboración do responsable da iluminación e o son. A nós pareceunos magnífica a representación e desde aquí queremos agradecer a todos eles o bo fin de curso que nos deron: grazas Pablo (Caleno), David e Marta (soldados), Yago (Emperador), Mónica (escrava), Lucía e Denise(presentadoras), Nico (Catulo), Inés (Arpexia), Paloma (Carmiñae), Darío (Manolitus) e Germán (sabio Citrón). Que pasedes un bo verán.

4º B gañan un premio de vídeo.

2010-06-10T21:19:00.003+02:00

O alumnado de 4º ESO B gañou o concurso "A ciencia na miña vida" organizado polos museos científicos coruñeses a nivel estatal, coa realización dun vídeo no que se propón cales poden ser os avances importantes no terreo tecnocientífico. O vídeo pode verse no blog do departamento de tecnoloxía do IES . Agora presentarán o vídeo a nivel europeo o 24 de xuño en Bruselas, a onde acudirán dous alumnos, en representación da clase, acompañados polo seu profe de tecnoloxía, Dani.

Expo Grecia e Olimpíada do saber

2010-06-03T17:37:00.004+02:00

O tema do proxecto interdisciplinar deste curso foi GRECIA, traballado desde cinco materias distintas: ciencias sociais, inglés, matemáticas, lingua e literatura. os de sociais tocaron as fases da historia de Grecia, centrándose na arte, historia e sociedade de Atenas e Esparta; os de inglés centráronse no museo británico e a arte grega que hai nel e as súas vicisitudes; os de lingua traballaron buscando información sobre as mulleres gregas, seleccionando as que destacaron e convertendo esa información en poemas acrósticos, investigaron sobre algúns mitos e autores e buscaron e interpretaron expresións procedentes da mitoloxía; os de matemáticas investigaron sobre os matemáticos gregos e os seus principais descubrimentos e teorías. Nas últimas semanas moitos materiais producidos foron subindo ao blog do proxecto, http://pinalex.blogspot.com/ Cos demais materiais fixemos unha exposición. Aos profes Miguel, Eva, Eugenia, Nones, Jesús e Sandra grazas por ese esforciño extra. Ao alumnado parabéns.

Con motivo da exposición, puxemos en marcha a nosa IV Olimpíada do saber, cunha innovación: realizouse a través dun curso moodle. A participación foi elevada e temos unha morea de estudantes de 1º e 2º que xa saben manexarse nas aulas virtuais. Esperamos que esta experiencia dea os seus froitos nun futuro próximo e anime á utilización das novas tecnoloxías como recurso pedagóxico.

Deixamos unha cuantas fotos (+ - 50) da expo.

Viaxe ao Courel lembrando a Novoneyra

2010-05-25T12:00:00.006+02:00

Onte, luns 24, realizamos cos mozos e mozas do club de lectura un roteiro literario polo Courel. Fomos visitando diversos lugares desta serra de outos cumios. Empezamos facendo unha parada para ver o pregamento xeolóxico de Campodola e Leixazós, despois continuamos ata a casa do poeta, en Parada, subimos ata o monte Formigueiros para divisar a devesa de Rogueira e o castelo de Carbedo. Despois de visitar a ferrería de Savane e de dar conta dun churrasco en Ferreirós de Abaixo, subimos ata o castro da Torre ou de Sobredo, vixía das explotacións mineiras. Tamén quixemos coñecer a realidade das aldeas courelás, visitando unha das que mellor conservan o modus vivendi do Courel, a aldea de Secedo. Rematamos cunha visita ao conxunto monumental de Hospital do Incio. Repartímoslles a todos/as unha guía da viaxe, para a cal contamos coa colaboración inestimable de Arximiro, que fixo de cicerone e nos explicou todo o que se pode saber sobre o Courel en tan pouco tempo. Moitísimas grazas.

Como é tradición nestes roteiros que realizamos cada curso, os rapaces/as do club, e tamén os profes, lemos poemas nestes lugares onde imos parando. Pero deixemos que apareza a crónica no blog do club, xa que este ano Yago pedíunos ser o cronista oficial da viaxe, para o cal andivo todo o día cunha libreta tomando notas. Díxonos que nunha semana terá a crónica feita. De momento deixamos unhas poucas fotos.

As Letras Galegas na biblioteca

2010-05-22T12:15:00.007+02:00

Cunha semana de retraso colgamos as fotos da actividade desenvolvida na biblioteca o día 14 de maio. Estamos á espera de ter confeccionado o vídeo da actuación musical, que colgaremos noutra ocasión.

Para celebrar o Día das letra Galegas, fixemos na biblioteca dúas horas de lecturas continuadas e voluntarias. Profesores e alumnado de distintos cursos foron pasando pola biblioteca a ler os textos que tiñan seleccionados, maioritariamente de Uxío Novoneyra, pero tamén de Rosalía, Celso Emilio, Suso de Toro e outros autores. Tamén houbo quen leu textos de creación propia.
Intercalados coas lecturas proxectáronse vídeos con textos de Novoneyra, Airas Nunez, Bernal de Bonaval, Rosalía e Bernardino Graña, interpretados por Emilio Cao, Miro Casabella, Amancio Prada e Suso Vaamonde.

Tamén tivemos expostos libros de Uxío Novoneyra, incluíndo primeiras edicións de Os eidos, os poemas caligráficos e Elegías del Caurel y otros poemas.

Rematamos a festa, como tódolos anos, cunha actuacuión musical de alumnas e alumnos do instituto, que nos deleitaron con música galega, canto, pandeiretas e baile. Grazas, mozos e mozas, polo voso compromiso e participación a prol da lingua e cultura galegas. Xa podedes ver as fotos e o vídeo, non vos perdades ás cantaruxas.

E o Luns 24 iremos co club de lectura ao Courel, nunha ruta lieraria da que daremos conta.

As matemáticas tamén se len

2010-05-18T09:35:00.002+02:00

As matemáticas tamén se len, e os alumnos e as alumnas de 1º de ESO quixérono comprobar e logo contárnolo. Empezaron, como non, lendo. De xeito voluntario, quen quixo escolleu na biblioteca un libro no que as matemáticas estivesen ben presentes: “El diablo de los números”, “Malditas matemáticas”, “El país de las mates para novatos”... A maioría destes libros foran recomendados na clase, pero hai que dicir que non todos: algúns alumnos fixéronse con novos títulos. Despois, compartiron o seu descobremento, para o que confeccionaron os murais expostos no vestíbulo do instituto. Por cada libro lido, unha crítica, ou unha ilustración, un problemiña ou unha brincadeira. Cada un o que quixo. E por suposto coidando o deseño: como podedes ver, o resultado é precioso, védeo con detenimento.

Parabéns rapazas e rapaces porque o voso traballo gustou. Recordade que vos esperan moitos máis libros na biblioteca, moitos deles coas matemáticas como protagonistas ou compañeiras no relato: “Proxecto Bolboreta”, “O curioso incidente do can a medianoite”, “Matemáticas en las matemáticas”...

Só un detalle: algúns preguntámonos por que un dos títulos máis escollidos foi “El asesinato del profesor de matemáticas”.

ALFIN coa prensa en 4º

2010-05-17T10:41:00.004+02:00

Dentro do plan de lectura anual, o departamento de galego continuou coa actividade de elaboración de xornais, esta vez co alumnado de 4º. Por unha banda, dirixidos por Carmen, elaboraron xornais nos que tiveron que buscar noticias, resumilas, reelaboralas e pasalas a galego para despois facer un traballo de maquetación onde se prestou especial atención á presentación, xogando cos espazos e a tipografía. Por outra banda, Antón dirixíu ao grupo que participa en "El país de los estudiantes" na elaboración dun xornal con noticias orixinais. Dende a biblioteca sentímonos orgullosos da continuidade destes proxectos ano tras ano e alegrámonos tamén de ser o espazo de traballo onde se desenvolven. Especialmente contentos de atoparnos cunha páxina A3 adicada á biblioteca que inclúe unha entrevista a Rosa Aneiros cando nos visitou e un artigo adicado ao club de lectura e outras actividades da biblioteca . Agora deixamos unhas fotos da exposición destes xornais que se fai no vestíbulo do insti e tamén as dun grupo traballando na biblio planificando a maquetación . En breve colgaremos eses traballos en formato PDF.

Óscar gañador da XII olimpíada matemática para 2º de ESO

2010-05-17T10:36:00.002+02:00

O noso alumno Óscar Iglesias González (2º ESO B) foi un dos tres gañadores da XII olimpíada matemática para 2º de ESO, celebrada o 14 de Maio de 2010 en Vigo.
Agora os tres gañadores participarán na fase final da olimpíada matemática estatal que se celebrará do 24 ao 28 de Xuño de 2010 en Palma (Mallorca).
PARABÉNS PARA ÓSCAR (no centro na foto) E PARA OS OUTROS DOUS GAÑADORES

1º ESO con Breogán Riveiro

2010-05-07T18:43:00.004+02:00

Onte tivemos unha amena sesión con Breogán Riveiro na biblioteca. Veu conversar co alumnado de 1º sobre o libro Tonecho de Rebordechao. O autor botou man da súa experiencia no mundo audiovisual para enganchar á xente nova, contando dun xeito moi expresivo historias a partir das que podía nacer unha novela. Animounos a botar man desas historias que poden contar os pais ou os avós para sacar o escritor/a que cadaquén leva dentro. Sorprendeunos sendo el o que preguntou (case sempre o pregunta alguén desde o auditorio) se alguén lle podía dicir por que era escritor, facendo que saísen unhas cuantas respostas ata dar coa que el consideraba correcta: a necesidade humana de comunicarnos cos demais.

Tamén falou de Tonecho, pero isto foi sempre a partir das preguntas que lle ían facendo, e respostou con claridade a todas, e incluso algunha rapaza descubriu un pequeno "erro de raccord" no libro do que o autor saíu airoso (non imos desvelalo para que os futuros lectores/as anden atentos) Despois dunha hora que pasou voando, o autor asinou exemplares da obra. Temos que engadir que se notou a presenza de mozas e mozos do club de lectura de 1º, sobre todo nas intervencións e no pequeno debate sobre o lobishome, algo do que desde a biblioteca agradecemos porque vemos que esta xente do club non lle ten medo a conversar.

Grazas Breogán por estar con nós e por ese Tonecho de Rebordechao que tanto gustou.

Riveiro Coello na biblioteca

2010-05-04T23:22:00.005+02:00

O mércores 28 estivo con nós Antón Riveiro Coello para falar co alumnado de 1º BACH da súa novela As rulas de Bakunin. Comezou contándonos a súa relación coa lectura dende a infancia e como a partir de aí comezou a súa carreira como escritor. A continuación, a través dunha presentación de diapositivas, fíxonos un percorrido polos lugares nos que transcorre a novela, da que dixo que non a consideraba a súa mellor obra, pero que lle ten un cariño especial porque é a que lle está a permitir ir aos centros educativos e falar dela co alumnado.

Explicou como escolleu o título: porque a palabra rula, ademais de ser un paxaro migratorio que simboliza a liberdade, tamén ten un valor afectivo, e a novela é unha historia de amor, aínda que co trasfondo dunha guerra civil chea de anécdotas, onde hai lugar incluso para personaxes escatolóxicos. Segundo o autor, estes personaxes xorden da dura realidade na que lles tocou vivir, e el mesmo ten certo temor a que a sociedade non os acepte.

Ante a dúbida suscitada entre o alumnado polo comportamento dalgúns personaxes, o autor concluíu que non podemos saber como actuariamos nós ante determinadas circunstancias históricas, pero si que temos que ter claro como nos gustaría ser.

Unha hora que nos soubo a ben pouco e esperamos contar con Antón para futuras ocasións, pois pareceunos interesante e amena a súa maneira de explicar a novela, ademais da boa conexión co alumnado.

Contacontos en inglés

2010-05-01T11:27:00.010+02:00

O pasado luns 26 estiveron na biblioteca Tim Bowley e Charo Pita e compartiron co alumnado de 1º BACH unha divertidísima sesión vespertina de contos en inglés con tradución ao galego. Foron dúas sesións, xa que tamén asistiu o alumnado do bacharelato musical e de artes escénicas que, aínda que teñen a súa sede no conservatorio, dependen do noso centro e comparten profes con nós.

Foi unha tarde entretida e de oídos afinados, onde Tim e Charo fixeron participar ao auditorio que conectou con eses contos que prenden as súas raíces na tradición oral de diferentes culturas.

Exposicións: E ti, para que les? e Tamén len...

2010-04-27T11:40:00.004+02:00

Desde a pasada semana temos polo centro as exposicións colectivas " E ti, para que les?" e "Tamén len". A primeira delas é unha recolleita de respostas que distintos persoeiros foron enviando ao blog da ONG IND. Tamén contamos coas respostas dos compañeiros e compañeiras das bibliotecas escolares galegas. Estás respostas están en carteis individuais deseñados por Jaime Eizaguirre. O alumnado estase encargando de pintar os monecos dos carteis e tamén eles aportan as súas respostas á exposición. A exposición Tamén len, mesturada coa outra, é un traballo colaborativo ao que as bibliotecas escolares fomos aportando fotos de persoeiros lendo e recomendando un libro. Sumámoslle aportación propias e achegas doutros centros. Agradecemos a todas as persoas que colaboraron na recollida de datos, maquetación e reenvío de todo este traballo.

Día do libro con Miguel Vázquez Freire

2010-04-24T08:30:00.006+02:00

Celebramos o Día do Libro con outra visita dun escritor. Desta vez, Miguel Vázquez Freire, o venres 23 de abril.
O autor, que fora profesor de Filosofía no noso instituto alá pola década dos noventa, achegouse agora para compartir cos rapaces e rapazas de 4º da ESO e do club de lectura as inquedanzas que a eles lles puidera suscitar a obra Anxos en tempos de chuvia, onde se plantean temas como a aceptación da morte de alguén querido, as ideas preconcibidas que poidamos ter acerca de algo ou de alguén, a relixión, a filosofía…
O autor planteou a visita como un achegamento ao alumnado. E entón, xa desde o comezo, Vázquez Freire optou por animalos a que lle preguntasen as súas dúbidas, as súas curiosidades,… E os rapaces e rapazas así o fixeron. E preguntaron polos lugares nos que se ambientara (lembremos que a obra está ubicada en Vigo e, en gran parte, no barrio de Coia, o noso), se os personaxes eran reais, o porqué do narrador en segunda persoa, se había diferenzas entre a xuventude actual e a da novela, pola súa decisión de ser escritor…
A verdade é que foi un rato ben interesante. E que nos anima a seguir achegando aos autores e a súa obra cos rapaces porque, adentrándonos nas entrañas da obra literaria, agardamos atrapar os lectores no gusto pola literatura

Mil grazas a que colabora con nós.

As razóns de Francisco Castro

2010-04-22T23:11:00.008+02:00

Escribir para soñar. Soñar con cambiar o mundo. Estas son, en palabras do autor, que nos visita por segunda vez este curso, os auténticos motivos que o moven a escribir e ben podería ser o título xénerico das dúas sesións que compartimos onte con Francisco Castro. Na primeira delas falou cos rapaces e rapazas do club de lectura de 1º ESO e cun grupo de 2º ESO sobre os libros Chamádeme Simbad e Un bosque cheo de faias. Falou da literatura como reflexo da realidade que vive e dun mesmo, que ten a posibilidade de loitar contra as inxustizas, neste caso abordando problemas que nos tocan de cheo, ben sexa a violencia neonazi ou os problemas cotiás que xurden cando nos facemos maiores. As rapazas e rapaces do club de lectura mostráronse moi activos no turno de preguntas, cousa que o autor agradeceu, e ao final asinou exemplares de Chamádeme Simbad. Preguntado sobre a escolla do nome de Simbad para o protagonista, Castro respostou que Simbad representa a aventura, e que todos os seus libros están protagonizados por Simbad, aínda que esta foi a primeira vez que lle puxo ese nome
Na segunda sesión, Francisco Castro falou cos rapaces e rapazas de bacharelato, que asistiran tamén á sesión anterior, do oficio de escritor.
Lembrou que o o ser humano precisa cuestionarse cousas, que a literatura, como a filosofía ou como a antropoloxía, desde ópticas diferentes, tamén se plantean. Pero a literatura, a diferenza delas, crea mundos novos, e entón o escritor convértese, ao xeito huidobriano, nun pequeno deus: é o creador total porque agora o mundo se transforma no que el quere que sexa.
Para el, a literatura vén satisfacer necesidades do ser humano como sentir emocións (pracer, terror, amor…), comunicar, vivir vidas diferentes, entender o mundo, atopar respostas… Porque a literatura, se presenta unha historia ben contada, fascina. A beleza que pode transmitir un verso, a condensación expresiva dun poema, os mundos que se esconden nunha narración son sensacións que producen pracer e que nos fan soñar. Porque, como dicía Cunqueiro, “o ser humano precisa, como beber auga, beber soños”.

Exposición Urbi et Orbi. Desde o galego para o mundo

2010-04-20T19:52:00.005+02:00

Despois da primeira actividade do mes de abril, unha sesión dos clubs de lectura o pasado día 12, continuamos as actividades do mes dos libros cunha exposición na biblioteca de literatura galega traducida a outras linguas. A exposición foi elaborada e cedida polos compañeiros do IES María Soliño (Xosé Martínez, Ramón Rocamonde, Henrique Harguindey e Salvador Castro) aos que lles agradecemos o enorme traballo realizado e que consta de 6 grandes paneis informativos (sobre a historia da tradución, os autores máis traducidos, fragmentos de obras coa súa tradución, etc.), 56 obras de autores galegos en diversos idiomas (incluíndo turco, macedonio, árabe e xaponés) e máis de trinta carteis con portadas doutras obras galegas traducidas. A exposición xa está sendo un éxito, e en só dous días xa recibiu numerosas visitas. Algúns profesores xa están organizando visitas co alumnado para buscar información sobre as obras.

Seguiremos informando do desenvolvemento das actividades previstas. Podedes consultar o programa neste enlace á nosa web

Bata por fóra, muller por dentro

2010-03-08T11:45:00.007+01:00

Para celebrar o día Internacional da Muller Traballadora , este ano contamos cun vídeo dunha creadora viguesa, Claudia Brenlla, que se titula “Bata por fóra, muller por dentro”. A nosa compañeira Chis tróuxoo ao centro e propuxo actividades para traballalo na aula, así como as ideas para a performance de hoxe. O vídeo é moi interesante, creativo e divertido . É en realidade unha homenaxe ás mulleres que traballan as súas casas, coidan dos pequenos e maiores, cultivan as leiras, mariscan, limpan as tumbas dos seus difuntos, etc, ataviadas moi a miúdo con esas batas. Batas con ou sen mangas, con botóns ou cinto, abotoadas diante ou detrás, case sempre de cadros, pero tamén de raias, flores ou lunares. Batas coas que protexen a súa roupa ou coas que se gardan do frío. Batas que din: "vou traballar" (e que se poñen a primeira hora da mañá e se quitan ben entrada a noite). E por suposto, batas coas que realizan un traballo que non coñece o que son as vacacións, xubilacións, pagas, pensións, nin ningún tipo recompensa e, sobre todo, admiración.
Alumn@s de diferentes cursos estiveron traballando sobre este vídeo: analizárono e escribiron poemas, microrrelatos e outros textos (que estaán expostos nos taboleiros da planta baixa do instituto). Ademais temos a "exposición" das batas no vestíbulo, que o enche de cor todos estes días e nos recorda moitas cousas, ademais das nosas antepasadas ("a miña avoa ten unha desas", comentoume un alumno estes días, "miña nai un feixe delas", dixo outra rapaza). Moita bata.
A celebración de hoxe luns no insti: virá a directora do vídeo a falar cos alumn@s de varios cursos que o traballaron. E a última hora, no patio, realizarase unha performance ( asistirán @s alumn@s de 2º e 4º de ESO, varios cursos de 1º e un de 2º de Bach, un 3º e un 1º de ESO) que consistirá no seguinte: primeiro faremos unha pequena introdución e leremos algúns dos textos escritos polos rapaces e rapazas, e logo os alumn@s dos diferentes cursos irán colocando as batas coas que previamente se fixeron sobre a silueta dunha bata xigante debuxada con xiz no chan. Desta maneira montarase unha bata pachtword xigante. @s alumn@s de tecnoloxía gravarán todo esto e montarán un vídeo.

Quince profesores/as de varios departamentos e uns trescentos alumnos/as veñen traballando na aula dende fai días, baixo a coordinación de Chis. Un proxecto interdisciplinar que no que teñen cabida as TIC, as matemáticas, as linguas, a filosofía, historia, cidadanía, música (tamén participa o alumnado do conservatorio). Un proxecto que foi agrandándose pouco a pouco ata o punto de que onte saímos en TVE (España directo), a coordinadora foi entrevistada na Cadena SER e hoxe, Luns, non deixaron de vir cámaras de distintas televisións e saímos na prensa.

Teremos que esperar uns días para poñer un post con todos os traballos feitos polo alumnado, as fotos de todos os eventos e os vídeos realizados nas clases.

De momento deixamos aquí o enlace á noticia do Faro de Vigo e o vídeo de TVE (debedes ir ata o minuto 21,10 aprox.)

Infórmannos tamén dende La educación sentimental que aparece a noticia en La voz de galicia.

É que as mulleres non "pintan" nada?

2010-03-02T11:48:00.002+01:00

Facemos hoxe esta proposta de traballo para a materia de Plástica, para o segundo ciclo da ESO. Trátase dunha Webquest sobre as mulleres pintoras. O traballo foi elaborado por Bea, seguindo na liña da exposición sobre mulleres pintoras que fixemos no curso pasado. Podedes consultar a webquest neste enlace ou ben indo ao apartado WEBQUEST da barra lateral.

Francisco Castro: un escritor con alma de rockeiro.

2010-03-01T10:04:00.005+01:00

Francisco Castro visitou a biblioteca do noso centro o pasado 24 de febreiro nunha xuntanza co alumnado de 2º e 3º de ESO sobre o seu libro Un bosque cheo de faias. Diante duns 90 estudantes e algúns profesores o autor falou arredor de dúas horas e comezou facendo un pequeno repaso á súa obra editada, que se iniciou aló polo ano 1991. Daquela tiña a ilusión de ser um rockeiro de guedellas longas e cancións de éxito, mais non puido ser e decidiu desenvolver o seu talento no eido da literatura.

Dedicou tamén unhas palabras ao traballo de escribir e afirmou que precisa dunha disciplina férrea e uns hábitos constantes. Asegurou que el, todos os días, se ergue da cama ás 5 da mañá, cando todo está silandeiro, para poder concentrarse e escribir en mellores condicións.

Un bosque cheo de faias trata o tema da xenofobia e o racismo. Un grupo neonazi está a facer das súas na cidade: pintadas, agresións ao diferente… Un día volven a súa ira contra Nelson, un inmigrante de 15 anos, e seu pai, médico do hospital. Os amigos de Nelson comezan unha serie de pescudas para descubrir os responsábeis que os levará a unha situación límite. A amizade, a intriga, as desconfianzas e malentendidos entre os rapaces, a falta de comunicación entre pais e fillos conforman outros aspectos salientábeis da obra.

O autor, nun ton distendido e ameno, desenvolveu diferentes cuestións relacionadas co tema. Chamou a atención sobre o perigo de elixir democraticamente a persoa equivocada, como aconteceu na Alemaña dos anos 30, cando Adolf Hitler gañou as eleccións. As sociedades democraticas deben estar ben informadas para decidir. Tamén afirmou que o que entendemos por racismo só se dá cando os diferentes son pobres. Ninguén é racista cun xogador negro da NBA, por exemplo.

Tamén comentou os Xogos Olímpicos de Berlín, en 1936, con Hitler como anfitrión. Nestes xogos todo estaba disposto para demostrar a superioridade da raza aria (como dicían os nazis). Pero un home negro de EE.UU. chamado Jesse Owens, que se preparaba correndo todos os días de casa ao traballo (nunha gasolineira) e do traballo a casa, gañou en todas as probas nas que participou. Hitler non quixo felicitalo por este éxito. Por moito que algúns se esforcen en buscar diferenzas, os humanos somos todos xeneticamente idénticos.

Explicou ao alumnado que as discriminacións poden tomar diferentes fasquías. Relacionou o tema co asunto da situación actual do galego, pois aínda hai persoas que ven sorprendente que os rapaces pequenos se expresen na nosa lingua. Cun ton irónico e divertido ridiculizou con éxito a situación: “Ai, fálaslle galego ao rapaz! E entende? Non, señora. Mándoo polas noites a unha academia”.

O alumnado participou activamente na quenda de preguntas. O autor tivo que responder durante unha hora unha chea cuestións, o que demostra o interese que espertou a novela entre os estudantes.

Rematou a sesión cun gran aplauso e unha multitudinaria sinatura de exemplares.

Francisco voltará en abril, para falar cos rapaces e rapazas do club de lectura do seu libro Chamádeme Simbad

Crónica de Fonso

Proxecto lector e inglés

2010-02-11T09:59:00.004+01:00

Desde finais do pasado trimestre, os grupos de 4º veñen traballando a lectura de noticias de actualidade en inglés. Cada día un ten que ler nun xornal en inglés e traer ao día seguinte a noticia resumida. Cada grupo ten unha libreta na que van escribindo a súa noticia, co obxectivo de comentalas despois nas clases. Deixamos unha presentación (perdón pola calidade, mellor vela en fullscreen) dalgunhas páxinas das libretas de clase tal e como as presentan.

Concurso matemático. Semana IV

2010-02-09T10:40:00.001+01:00

Últimas preguntas do concurso:

Primeiro ciclo

Segundo ciclo

Unha lingua, unha identidade

2010-02-08T10:49:00.008+01:00

O pasado 1 de febreiro, asistiron ao noso centro, coa intermediación da ONG "Educación sen Fronteiras, dous profes peruanos que deron unha charla sobre a situación dalgunhas linguas minoritarias no mundo, centrándose fundamentalmente na lingua quechua.

Dixéronnos que o conxunto dialectal quechua está considerado unha soa lingua e que esta estendido por toda a zona occidental de suramérica. Ao parecer, o quechua estase a usar somentes nos ámbitos coloquiais pola poboación, mentras que o castelán se emprega nos sectores de máis prestixio social: medicina, educación, e incluso no sector agrario.

A ONG "Educación sen Fronteiras" pretende evitar que o quechua quede relegado, para o que iniciou un proceso de recuperación da lingua propia, que consta de tres fases. O proceso iniciouse en 2008 e prevese que estea rematado en 2021. Iniciada a fase de motivación, continuarán coa de implementación para lograr que a lingua sexa de uso oral e escrito para, posteriormente, acadar a normalización.

Actualmente, a ONG mostra a súa preocupación especial pola situación lingüística no plano educativo, pois aseguran que co actual sistema (onde o idioma propio está relegado ao ámbito familiar) os nenos non aprenden de forma correcta ningunha das dúas linguas.

Crónica de Judith Iglesias

55 mentiras sobre a lingua galega

2010-02-07T18:36:00.003+01:00

O pasado venres presentouse a nivel mundial o libro "55 mentiras sobre a lingua galega". Deixamos aquí unha presentación, amablemente cedida por A profa, que resume as ideas principais dun libro que realmente non ten desperdicio.

Prolingua 20 Mentiras sobre a lingua galega (2010)

View more presentations from A profa .

Cartas e sonetos de amor

2010-02-04T09:25:00.004+01:00

Xa podedes participar nesta 5ª edición do noso certame de cartas de amor, esta vez con novidades, unha categoría de sonetos que traerá a ledicia aos/ás que tedes unha vea máis poética. Podedes, polo tanto, escribir unha carta ou un soneto de amor. O prazo para entregalo na biblioteca é o 22 de febreiro.

Concurso matemático. semana III

2010-02-01T08:32:00.002+01:00

Problemas desta semana:

Primeiro ciclo ESO

Segundo ciclo ESO

Bacharelato

Día da Paz no insti

2010-01-30T10:35:00.005+01:00

Como tódolos anos, onte celebramos o Día da Paz. Cos grupos de primeiro ESO centrámonos na concienciación sobre os diversas implicacións da palabra: as desigualdades, a pobreza, a tolerancia, a emigración, a supervivencia en condicións extremas (Haití)... Para iso proxectamos unha recopilación de vídeos de produción propia xunto coa curta de Pixar "Pigeon Impossible", que utilizamos para romper o xeo e facer pensar sobre as diversas caras da Paz (esa pomba/bomba) Consideramos os vídeos como unha ferramenta na que tratamos de asociar as letras coas imaxes que fan comprender o sentido dos textos, e non só utilizamos cancións, senón tamén poemas. Sorprende (ou xa non) o feito de que TODOS os vídeos foron moi aplaudidos, tanto as cancións como os poemas, igualmente en castelán que en galego, inglés e catalán.

Por outra banda, colocamos a exposición de murais que participan no concurso convocado por nós. A maioria deles foron traballados nas aulas durante estas últimas semanas, polo que agradecemos a colaboración do profesorado que orientou as distintas buscas de información. Tamén demos cabida a outros murais e carteis feitos para participar no concurso.
Por último, celebramos na biblioteca un concurso de redacción, voluntario, no que xa non tivemos tanta participación, pero que agardamos sexa xérmolo de futuras convocatorias que acadarán éxito coa axuda e promoción do profesorado

Visitounos Rosa Aneiros

2010-01-29T11:21:00.007+01:00

Visitounos o mércores 27 Rosa Aneiros, e foron os alumnos e alumnas de 4º de ESO e do club de lectura os que puideron asistir a unha charla fresca, distendida e amena que nos deu a xornalista.

Lembroulles aos rapaces que o oficio de escritora nace do traballo (como case todo, por outra parte), sumado a unhas doses de aptitudes, claro está. E que unha obra nace en moitos casos froito da casualidade: unha noticia de prensa, unha foto, un encontro casual, unha viaxe (coma a súa á Marinha Grande e da que saíu Resistencia, a obra que leron os nosos alumnos). Desta viaxe, contounos a autora, saíu curiosamente a idea da obra: Unha visita ao cárcere de Peniche (hoxe convertido en museo) e o encontro co horror, o de Dinís Miranda, un preso da época da ditadura salazarista, que non pode enviar uns contos ás súas fillas porque a policía pensa que poden esconder mensaxes secretas.

Comparou a creación dunha novela cunha árbore porque esta acolle moitas ponlas, que se abren en moitas direccións, que recollen moitas historias. E que estas historias deixan de ser súas para pasar a ser dos lectores. Lembraba a narradora a historia dunha rapaza que lle dicía que odiaba un personaxe dunha novela súa porque levaba o nome da moza que lle roubara o noivo... Logo, a obra xa collera vida propia, xa era máis que o que a novelista imaxinara.

Tamén comparou o seu labor de xornalista co de narradora e concluíu que era máis “informativo” este último, malia parecer unha contradicción. E lembrounos unha viaxe como xornalista ao Sáhara e que, como reporteira, “só” contaba o que vía a ollada da xornalista; pero que desa viaxe saíron historias literarias e entón contaba, a través da ollada dun saharaui, máis sentimentos, máis emocións, máis vivencias… que as da mirada obxectiva do forasteiro. E que iso é o que lle dá un especial valor á obra literaria: a transmisión dos sentimentos máis íntimos do ser humano.

E seguiu falando e falando, ata completar, coas preguntas dos rapaces, case dúas horas, que pasaron rápidas. Porque dixo cousas interesantes. Pero tamén porque foi próxima, cordial, afable, sinxela… e os rapaces e rapazas agradecéronllo. E nós tamén.

Como facemos sempre que nos visita un autor/a, preparamos unha guía que repartimos entre o alumnado

Podedes ler tamén a crónica que fai Marta no blog do club de lectura.

Cumprimos 3 anos

2010-01-28T10:14:00.003+01:00

O 30 de xaneiro de 2007 botou a andar este blog que naceu coa vocación de servizo á comunidade educativa e de difusión da nosa cultura. Ao longo destes tres anos vimos cumprindo, con maior ou menor acerto, unha dobre función: por unha banda, dar a coñecer as nosas actividades, ofrecendo a posibilidade de interactuar con nós a través dos comentarios, e, por outra, poñer a disposición de todos vós unha serie de recursos educativos a través da nosa barra lateral.

Longa está a ser esta andaina dun blog que naceu pequeniño e que medra cada día grazas a vós. Pouco a pouco fómolo enchendo e perfeccionando, incluso unha vez chegamos a ser finalistas do Premio Edublogs.

Aproveitamos para lembrar tamén os blogs que naceron deste: o blog do club de lectura e o do proxecto interdisciplinar, así como os blos dos profesores e profesoras aos que lles picou o gusaniño blogueiro e lles axudamos a crear os seus propios blogs. Agradecidísimos estamos por poder ser útiles. Agradecemos tamén aos blogs das bibliotecas escolares galegas as súas aportacións, a súa paciencia cando tivemos problemas e aí estiveron para botar unha man, e, sobre todo, os seus amigables comentarios.

Lembramos agora, a través deste enlace, a primeira noticia, a do alumbramento, que promocionaba "o libro do mes", unha actividade que segue viva no noso centro, que contribuíu á difusión de moitas lecturas e ao incremento do número de lectores, que foi o primeiro paso para a creación dos clubs de lectura, a implantación da "Hora de Ler" e ao mesmo tempo foi unha actividade pola que se interesaron moitos outros centros.

Concurso matemático. Semana II

2010-01-25T11:33:00.003+01:00

Estes son os problemas:

Primeiro ciclo de ESO

Segundo ciclo de ESO

Bacharelato

Concurso matemático. Semana I

2010-01-18T10:24:00.002+01:00

Pica nos enlaces para ler as preguntas desta semana:

Problema para o 1º ciclo da ESO

Problema para o 2º ciclo da ESO

Problema para bacharelato

Actividades para xaneiro

2010-01-18T09:12:00.003+01:00

Durante este mes temos en marcha diversas actividades ALFIN: o próximo luns comezará un concurso de resolución de problemas matemáticos. Este concurso é a conclusión da actividade do plan lector que estamos levando a cabo neste curso, que consiste en facer un maior fincapé na lectura comprensiva de enunciados de problemas matemáticos. Terá catro semanas de duración. O luns 18 publicaremos o primeiro problema neste blog e tamén na web do insti

Outras actividades en curso gardan relación coas celebracións do Día da Paz, para o cal propuxemos un concurso de murais e un de redacción. Para o concurso de murais algúns titores e profes están a desenvolver esa tarefa nas aulas, dirixindo os murais do alumnado participante. O concurso de redacción farase o día 29 na biblioteca, e o profesorado colaborador adicará parte do tempo de clase a dar pautas para a elaboración dos textos.

Deixamos aquí os carteis das convocatorias.

Proxecto ALFIN contra a violencia de xénero

2009-12-18T21:22:00.006+01:00

Durante o mes de novembro, todos os grupos de 2º ESO viñeron traballando nas clases de cidadanía o tema da violencia de xénero. O resultado deste proxecto foi unha exposición dos murais que realizaron: definicións, causas da violencia, slogans, recortes de prensa, medidas preventivas, cancións, encrucillados... Estes traballos, enmarcados dentro do proxecto lector, terán continuidade, xa que ata finais de xaneiro estarán a traballar sobre os Dereitos humanos e posteriormente sobre a Paz. Iremos dando conta de cada un deles

Alfonso Armada, periodismo e Dereitos Humanos

2009-12-10T00:36:00.008+01:00

Hoxe, como estaba previsto, recibimos a visita de Alfonso Armada, periodista e director do Máster do xornal Abc, ademais de autor teatral e poeta en lingua galega e autor de ensaios en castelán. Recibímolo cunha pequena exposición da súa obra e co reparto das guías de lectura que fixemos para a ocasión.

A visita, como contamos no post anterior, serviu de complemento ao proxecto que puxemos en marcha desde a biblioteca para que nas aulas se traballase coas noticias de actualidade, ao tempo que, polo contido da charla, enlazamos directamente coa celebración do Día dos Dereitos Humanos. Neste proxecto de análise da actualidade hai máis grupos implicados (do que xa daremos conta), pero esta vez foi o turno de 2º bach..

Nunha exposición de máis dunha hora, Alfonso Armada fixo un percorrido pola súa traxectoria vital, desde os seus comezos no noso instituto ata a dirección do Máster, pero centrouse especialmente nos dous mundos cos que tivo máis contacto profesional: África, especialmente o conflicto de Ruanda, e EEUU., onde lle tocou vivir dende o atentado das torres xemelgas ata a carreira electoral de Obama. Soubemos de como traballa un reporteiro no medio dun conflicto, das condicións nas que hai que enviar unha crónica, dos temas que “interesan” aos xornais e dos que non, dos protagonistas no medio dos conflictos (o pobo, exércitos, forzas de interposición, periodistas, igrexa…)

Suscitou moitas preguntas entre o alumnado, nun turno de media hora que houbo que cortar por falta de tempo. Desa quenda de preguntas quedamos con algunhas respostas ás inquedanzas do noso alumnado:

- Que hai que repartirse as culpas do que pasa en África, porque asumir nós toda sería considerar á sociedade africana como inmadura, e por outra banda os seus gobernantes moitas veces actúan en connivencia con compañías europeas ou americanas para enriquecerse eles empobrecendo ao pobo.

- Que estar entre os desfavorecidos faite relativizar as cousas, repensar o que é importante e o que non.

-Que algúns países africanos acadaron certo nivel de democracia e baixa corrupción (Boshwana, Namibia, Cabo Verde…)

- Que cando falamos de EEUU. hai que ter en conta que os tópicos que manexamos non explican a realidade, fundamentalmente porque o país ten unha enorme capacidade de reinventarse a si mesmo (exemplo da chegada de Obama á Casa Branca)

E como estamos na escola, rematou falándonos da escola pública en EEUU., onde lle sorprendeu a gran cantidade de actividades que realizan arredor da lectura e a escritura, dado que os rapaces len uns 25 libros por curso, coa súa ficha para entregar, e fan talleres de escritura contando con expertos universitarios… e en todas as actividades hai unha ampla participación dos pais.

Unha xornada que nos dará moito que pensar para moito tempo, polo que agradecemos a Alfonso a súa boa disposición e ao alumnado, a súa atención e participación.

Preparación da visita de Alfonso Armada

2009-12-04T11:12:00.004+01:00

Unha das actividades propostas pola biblioteca para o desenvolvemento do proxecto lector foi o traballo na aula con temas de actualidade, lendo na prensa, comentando, buscando información...

Neste marco, tomaron a iniciativa a profesora de galego, Carme, e o profesor de historia, Ricardo. Buscamos alguén que puidese explicar ao alumnado de 2º bach. algúns dos temas candentes no mundo actual, e de aí xurde a iniciativa de contar co escritor e periodista Alfonso Armada, que nos visitará o día 9 deste mes.

Como colofón a todas as informacións suministradas, os profesores prepararon unha sesión conxunta con todos os grupos coordinada polo profesor Ricardo Álvarez onde, sobre todo, se falou de África, nunha charla concibida máis para suscitar interrogantes que para ofrecer certezas. Falou o profesor do gran descoñecemento que temos do continente africano, a pesar do seu tamaño; da diversidade étnica, relixiosa, cultural e xeográfica; e, desde logo, das súas riquezas.

Referíuse ó drama que supuxo o escravismo e o éxodo de gran parte da xuventude actual cara a Occidente en busca dun futuro mellor. O colonialismo como causa desta emigración masiva e como culpable do expolio das súas riquezas. Falouse da explotación dos homes e dos recursos por parte dos países europeos que se convertiron en "amos" de tan vasto territorio; da connivencia cos ditadores ou a imposición directa de gobernos títeres.

E tamén apareceu o tema da SIDA, pandemia que asola o continente, con todos o dramas que contribúen á súa expansión: escasez de retrovirais, supersticións, influencia da Igrexa católica que nega o uso do preservativo como medio eficaz para a prevención.

Dende logo que se suscitou a curiosidade. Esperamos a Alfonso Armada para seguir mergullándonos nos temas que preocupan no noso mundo actual.

Por suposto, tamén recomendaremos a lectura dalgunha das súas obras, que temos na biblioteca e que podedes consultar picando aquí.

O club de lectura na Voz de Galicia

2009-11-29T11:31:00.005+01:00

Hoxe a Voz de Galicia publica unha reportaxe sobre o impulso que as bibliotecas escolares galegas lle estan dando ao desenvolvemento das capacidades lectoras. Para a reportaxe contaron coas experiencias de varios centros da Comunidade, e o noso foi o elixido para contar a experiencia do club de lectura. Na entrevista contamos como escollemos os libros e organizamos as sesións, pero tamén as outras actividades que realiza o club (teatro, lectura de poesía, rutas literarias, encontros con escritores na nosa lingua, colaboración con outras actividades do centro...) que non aparecen recollidas na reportaxe, supoñemos que por falta de espazo. Deixamos aquí os enlaces da reportaxe.

Introducción

O noso club
Hora de ler no Pardo Bazán
As mochilas viaxeiras

Grazas a todos os/as que vos facedes eco desta nova difusión do traballo das bibes galegas.

Contra a violencia de xénero no instituto

2009-11-27T00:35:00.003+01:00

O mércores, día 25, coma todos os anos, organizamos dende a biblioteca unha campaña de concienciación contra a violencia de xénero. En catro sesións ao longo da mañan, organizáronse sesións no salón de actos para todos os grupos da ESO. Ali, despois de ler un breve alegato da biblioteca, puideron ver o vídeo realizado polos compañeiros de Trafegando Ronseis xunto con tres power points con imaxes, textos e música (Salir corriendo, de Amaral; Ella, de Bebe e Hogar, de Pedro Guerra). No medio das imaxes fomos intercalando as recomendacións de lectura sobre o tema. Tamén se puxeron á disposición do alumnado guías de lectura, que se esgotaron, coas obras da nosa biblio que tocan o tema da violencia contra as mulleres . Temos que agradecer o comportamento respectuoso do alumnado así como o traballo previo feito nas aulas polos profes/as que quixeron charlar sobre o tema co alumnado e a súa asistencia e colaboración ao longo da mañán. E, como non, grazas polos aplausos, que sempre nos dan un chisquiño de animo para seguir traballando por e para vós.

Non á violencia contra as mulleres

2009-11-25T18:03:00.003+01:00

A amiga Loly, dende o Segrel, facilítanos esta presentación na que tan ben analizado está o tema da violencia contra as mulleres.

Non vos perdades este enlace a Trafegando Ronseis, onde podedes atopar informacións de todo tipo.

Non á violencia contra as mulleres

2009-11-25T00:32:00.004+01:00

Anxo e Gracia, de Trafegando Ronseis, déixannos este vídeo do que teremos ocasión de disfrutar nas sesións de hoxe.

Non á violencia contra as mulleres.

2009-11-25T00:00:00.003+01:00

Charo, dende o blog amigo Mesturas, achéganos esta presentación artística e chea de sensibilidade, que recolle todo o que hai que dicir contra esta lacra que estamos a padecer. Unha visión novedosa que agradecemos enormemente.

Efecto mariposa

2009-11-10T23:38:00.006+01:00

Vimos de colgar na barra lateral un apartado adicado aos proxectos do departamento de tecnoloxía. Para estrenar a sección velaí vai este vídeo do proxecto realizado por Óscar, Álex, Paula e Raquel.

A biblioteca na Prehistoria

2009-11-10T17:13:00.005+01:00

Durante toda esta semana temos na biblioteca unha exposición de petroglifos da nosa provincia. A exposición foi cedida polo Instituto de Estudos Miñoranos e está sendo visitada pola comunidade educativa. Xunto coa exposición, trala preparación nas clases das profesoras de historia e antropoloxía, teremos unha conferencia na biblioteca o próximo xoves, a cargo do arqueólogo do citado Instituto, Xosé Lois Vilar, para o alumnado de 1º bach. O Venres desenvolverase a actividade final, que consiste nunha visita nocturna aos petroglifos de Auga da Laxe, na serra do Galiñeiro, contando con Xosé Lois Vilar como guía. Non é a primeira vez que o IEM organiza visitas nocturnas deste tipo, nas que se pretende ter unha nova visión dos gravados coa luz rasante artificial.

Club de lectura e hora de ler

2009-10-22T09:46:00.004+02:00

A pasada semana iniciamos a actividade do club de lectura, aínda en fase de admisión de novos compoñentes. Está tamén en fase de formación un club de lectura específico para o primeiro ciclo. Polo que respecta ao club veterano, xa estamos coa lectura de A perla, de Jonh Steinbeck, xa que na primeira sesión decidimos que este curso íamos ler algúns dos clásicos do século XX, e non está nada mal a obra do californiano, premio Nobel de 1962.

Por outra banda, tamén comezou no centro a hora de ler, neste curso en sesións semanais dunha hora lectiva, todos os luns, rotando a hora cada semana. Lembramos que podedes facer os comentarios sobre as lecturas que recomendades se picades sobre a foto da biblio que hai na columna da dereita. Con esa mesma acción poderedes tamén ler as recomendacións dos vosos compañeiros/as.

Seguiremos informando de novas actividades, como eses proxectos documentais sobre temas de actualidade que se están tratando de poñer en marcha.

Unha nova andaina

2009-10-10T11:18:00.014+02:00

Despois de tres semanas de arduo traballo por parte do equipo de biblioteca, e coa colaboraboración doutras profes, quixemos comezar este curso facendo algunhas melloras que incrementen o espazo e que faciliten o acceso aos materiais da biblio. Cambio de andeis dun lado para outro con posterior man de pintura, reubicación de máis da metade dos nosos fondos, expurgo, fichado de novidades, introducción no programa do alumnado novo, coordinación do novo proxecto interdisciplinar (este ano toca Grecia), preparación da formación do alumnado novo...Todo isto mantívonos ocupados ata agora.

Para a próxima semana iniciaremos novas actividades relacionadas co plan lector, das que xa daremos conta; retomaremos o club de lectura despois do regreso da maioría dos seus membros que estiveron en Gran Bretaña nun programa de inmersión lingüística.

Pero agora queremos amosar o resultado do traballo físico:

- Reubicamos toda a literatura na sala de lectura, creando unha illa literaria ao lado da sala de lectura relaxada.

- Os fondos de consulta atópanse todos na sala de
traballo en grupo.

- Cos novos andeis na zona interior conseguimos máis espazo e luminosidade para a mediateca e para sala de traballo en grupo .

Deixamos unha presentación de todo este proceso, esperando que estes cambios sexan para ben e redunden no beneficio de toda a comunidade escolar

O achado do castro

2009-06-24T01:34:00.006+02:00

Luns, cinco da tarde. Os rapaces e rapazas do club de lectura e máis algúns ousados de terceiro por fin representaron a obra de Manuel Núñez Singala O achado do castro, con tan gran éxito de crítica e público, que decidimos seguir traballándoa para o próximo curso. A pesar do pouco tempo de ensaio, a obra saíu perfecta, dentro do marxe permitido da perfección. Esta vez representouse para o alumnado de primeiro da ESO que estivo todo o ano a traballar o tema de Roma dentro do proxecto interdisciplinar. Houbo moitas risas e merecidísimos aplausos, que nalgúns momentos interrumpiron a obra. Felicitamos dende aquí aos actores e actrices, así como a ese público tan entendido en temas clásicos. Amenazamos con mellorar para o próximo curso e facer caer de risa aos demais grupos do instituto. Grazas a Cristina, de quen partíu a idea e dirixíu todos os ensaios; a Bea, que puxo á xente a traballar nos decorados. Do productor non imos dicir nada.

Podedes ver as fotos en tamaño grande en http://leraboveda.blogspot.com/2009/06/o-achado-do-castro.html

BubbleShare: Share photos - Find great Clip Art Images.

Norte e Sur. Visitando bibliotecas

2009-06-21T18:12:00.008+02:00

Non, non nos estamos a referir á novela de John Jakes, senón á visita que o pasado xoves fixemos a dúas bibliotecas emblemáticas da nosa comunidade (galega, non de veciños). Chegamos primeiro a Cambre, ao instituto Alfonso X o Sabio, onde nos agardaba o mestre Toño para mostrarnos a biblioteca O bosque animado. Ademais de admirar a recén remodelada biblioteca (este ano ganadora dun premio nacional), tivemos ocasión de aprender moitas cousas sobre o mobiliario e a disposición dos fondos, cuestións ambas nas que tiñamos moito interese. Non dispoñemos de reportaxe gráfica desta primeira visita, as fotos son todas no Segrel (os duendes da prensa).

Despois dirixímonos a Fene, onde nos agardaba Loly para visitar o Segrel do Penedo, aínda que antes decidimos facer unha parada para repoñer fosfatos, potasio e unha amplia gama de vitaminas, nun lugar moi saudable no que non se podía fumar nin vendían tabaco (altamente recomendable por outras esquisiteces). Xa con novos bríos, chegamos ao IES de Fene, onde disfrutamos da fermosa biblioteca á que non lle falta detalle e puidemos falar disto e máis do outro (cousas nosas) nos comodísimos sofás que non están feitos para despois de comer. Tamén apuntamos algunhas boas ideas para a nosa biblio. Aínda tivemos ocasión de coñecer a algún amigo regueifeiro e visitar outras instalacións do centro.

Grazas amigos por compartir con nós esta xornada tan instructiva.

A illa do tesouro e a Ruta de Rosalía

2009-06-04T18:22:00.004+02:00

As últimas actividades que realizamos co club de lectura foron unha sesión arredor de A illa do tesouro e a ruta literaria de Rosalía, unha viaxe con poesías por Padrón, Bastavales, Ortoño e Santiago. Podedes consultar as crónicas nos enlaces que vos dixei, correspondentes ao blog do club de lectura. Aínda nos falta a representación de O achado do castro, que se fará no festival de fin de curso. Deixo algunhas fotos da ruta.

Hip-hop galego no instituto

2009-05-30T09:53:00.006+02:00

O xoves estivo no IES, nun taller para o club de lectura e 1º BACH de música, García, un membro do colectivo "Dios que te crew", grupo de hip-hop galego. Previamente, o alumnado realizara un mural coas últimas tendencias do rock, pop e hip-hop galegos.

Comezou cunha charla de achegamento á cultura hip-hop e ás súa vertentes artísticas: breakdance, graffiti, DJ'ing e rap. Insistíu en desmontar a idea do rapero como chulo, violento, machista con cochazo e cheo de alfaias, reivindicando o rap como potenciador da comunicación e da reflexión, como un xeito de expresarse e facer poesía. Despois demostróunolo cunhas actuacións nas que interpretou diversos temas, algúns con letras de Celso Emilio. E por suposto que nós tamén participamos e incluso nos atrevemos a mover os brazos ao xeito rapero. E non faltou a sinatura de autógrafos.

BubbleShare: Share photos - Play some Online Games.

Proxecto Roma e Olimpiada do Saber

2009-05-24T14:42:00.007+02:00

Esta pasada semana fomos colocando polo instituto os materiais elaborados polo alumnado do proxecto interdisciplinar. A biblioteca sumouse (tal como estaba planificado) aportando materiais propios. Na expo pódense ver materiais sobre Roma elaborados dende as distintas materias de 1º ESO: Ciencias naturais, ciencias sociais, Lingua e literatura, Inglés e Matemáticas. Na biblioteca tamén instalamos un MUSEO de obxectos romanos (os obxectos foron cedidos polo CEDAM do museo Quiñones de León). Podemos ler sobre medicina, velenos, minas, historia, romanización, sociedade, obra civil, literatura, mitoloxía e relixión, toponimia, expresións latinas, calendario, números romanos, e sobre todo apreciar a imaxinación que lle botaron niso das artes plásticas.
Parte deste material fórono colocando nun blog propio do proxecto, feito polo alumnado despois

de recibir formación por parte da biblioteca.

Ao mesmo tempo comezou a Olimpiada do Saber, que este ano durará quince días, co tema da exposición.

A petición do senado e o alumnado romano do IES, incluímos algunha foto máis da expo, sobre os calendarios, xogos romanos e romanización de Inglaterra.
BubbleShare: Share photos - Easy Photo Sharing

Día das Letras Galegas... As nosas

2009-05-15T18:33:00.004+02:00

Hoxe celebramos outra tanda de actividades das Letras Galegas:

Algúns grupos de 1º e 2º ESO viñeron, durante dúas horas, á biblioteca, onde realizaron lecturas públicas de textos seleccionados por eles previamente (predominaron as poesías, aínda que tamén houbo contos e algún relato moi breve). Magnífico traballo deste alumnado que xa asistira en marzo aos actos do día da poesía.

Os demais grupos de 1º e 2º, nunha sesión, e os de 3º e 4º, noutra, asistiron no salón de actos ao visionado de presentacións de power point de poesía galega musicada. Alí estaban Martín Códax, Bernal de Bonaval, Airas Núnez, Francisco Añón, Rosalía, Pondal, Curros, Cunqueiro, Celso Emilio, Lois Pereiro, Bernardino Graña e un auditorio que ás veces cantou e outras tantas barullou.

Os de 1º BACH. tiveron unha conferencia sobre Ramón Piñeiro a cargo do profesor Álvaro Varela. Foi unha conferencia dun gran nivel intelectual e expositivo que nos tivo atentos de principio a fin. O amigo Álvaro foi desgranando con claridade as claves biográficas, políticas, literarias e culturais do persoeiro homenaxeado este ano. Esperamos a súa próxima conferencia-recital (a principios do próximo curso), que versará sobre o noso Ramiro Fonte.

E no recreo, o noso grupo favorito "Os farfalleiros", tocaron varias pezas, entre elas o Pirín pimpím, acompañados vocalmente polos grupos de música dirixidos pola profe Ángeles, tras semanas de duro ensaio... Tamén houbo baile. Deixamos aquí un vídeo (baixa calidade) do acontecemento musical

E para a semana... OLIMPIADA DO SABER

Xurxo Souto na biblio

2009-05-12T19:55:00.004+02:00

Onte tivemos na biblioteca un encontro con Xurxo Souto, narrador, músico, actor e compañeiro nisto da filoloxía clásica. O autor de Tres trebóns (ed. Galaxia) iniciou a nosa semana das letras cos segundos de bacharelato. Unha hora moi entretida arredor do noso idioma, da cultura en galego. Contounos historias nas que a lingua é a protagonista, dende "Antuerpe" a "Capetón", de Terranova á Bouzas, a lingua do mar, o galego panoceánico. Pero tamén soubemos de historias do interior, de música en galego (fantástica a historia de Josefa de Bastavales, Manu Chao e Pinto de Herbón). Para o fin de festa tamén lle botamos unhas pezas daquela maneira. Despois todo foi chuvia. Grazas amigo Xurxo por esta despedida tan alegre que tiveron os/as de segundo.

Presentación do Dicionario de escritores de Deza

2009-05-10T23:00:00.005+02:00

O pasado Venres, en Lalín, un nutrido grupo de bibliotecarios escolares quixemos arroupar á nosa compañeira, Gracia Santorum, na presentación da súa obra "Dicionario de escritores de Deza", editado por Fervenza. Un emotivo acto que comezou e rematou coa música de laúde de Diego Rojo e no que, ademais da autora, interviron o prologista Mario Pereira e o contacontos Celso Fernández Sanmartín. Coa sala do museo Ramón María Aller Ulloa abarrotada, Gracia emocionounos a todos coas súas palabras sempre cheas de gratitude e amizade. Pero o verdadeiramente importante era a obra da que se estaba a falar, un dicionario que nalgunha medida rescata do esquecemento parte do noso legado cultural .

Aquí deixo a reportaxe gráfica:

Entrevista a Gracia Santorum

Día do libro...por materias

2009-04-23T23:34:00.010+02:00

Hoxe, culminando a celebración da semana do libro, sacamos os libros ó vestíbulo. Este ano dun xeito especial, pois fixemos a exposición dos libros daquelas materias que están a elaborar os itinerarios lectores, a excepción de latín, que os sacaremos na exposición sobre Roma. Ademais serviron de mostra para a comisión pedagóxica que se desenvolveu pola tarde, onde se aprobou o proxecto lector e chegouse ao acordo de propoñerlle ó claustro unha hora de lectura completa á semana para todos os grupos da ESO.
Durante a mañán, ademais, tivo lugar un ciclo de conferencias a cargo da Cámara de comercio, nas que se animou á creación de iniciativas emprendedoras no mundo da empresa.

Miguel Anxo Murado na biblioteca

2009-04-20T13:00:00.018+02:00

Hoxe, comezando a celebración da semana do libro, tivemos unha xuntanza con Miguel Anxo Murado. Os segundos de bacharelato para conversar acerca do libro Ruído. Relatos de guerra, e os do club de lectura co libro Fin de século en Palestina. Para a ocasión repartimos unhas breves guías de lectura sobre o autor. Murado non decepcionou aos lectores/as. Falounos das súas experiencias en Croacia e Palestina, da vida cotiá entre os conflitos, da normalidade dos ruídos da guerra e fíxoo nun tono realista e desmitificador, comunicando moi ben a mensaxe de que nas guerras só hai cousas malas (en contra do dito de que as guerras sacan o mellor e o peor do ser humano) Tamén tivemos un intre para as opinións e preguntas sobre a vida dos reporteiros e o conflito palestino. Asinou libros ao alumnado e algúns deles, cando marchou o autor, comunicáronnos a súa satisfacción por este encontro. Por este curso pechamos o ciclo que iniciamos coas actividades do Día da Paz centradas no conflito palestino. Agradecemos a Miguel Anxo a súa disposición, amabilidade e o gran comunicador que é. Grazas tamén á Editorial Galaxia por colaborar neste encontro que comezou a fraguarse xa no curso pasado.

Visita de Fernando Lalana.

2009-03-26T01:00:00.005+01:00

Hoxe tivemos un encontro co escritor Fernando Lalana. Dende fai máis dun ano, cando puxeramos La tuneladora como libro do mes (incluído na lista White Ravens), tiñamos pensado preparar algo con el. A ocasión chegou da man do seu último libro El asunto Galindo, unha novela policiaca co mesmo protagonista que La tuneladora. O departamento de lingua castelá incluíu este libro entre as lecturas para terceiro de ESO, e dende o club de lectura tamén o aconsellamos. Había máis dun mes que se xenerara unha gran expectación ao redor da súa visita, pois os libros gustaron moito. Incluso chegou a haber intercambio de correos electrónicos co autor.

Non decepcionou: Falounos da súa historia como escritor profesional co mesmo humor e ironía que destila nós casos do detective Escartín (co seu curso sacado en CEAC). Manexou a un auditorio abarrotado sen permitir que se lle fose das mans, para despois contestar a unha chea de preguntas con xenerosidade e paciencia. Despediuse con gratitude e asinou exemplares dos seus libros e algúns alumnos regaláronlle ilustracións que fixeron de El asunto Galindo. Tamén quixo levar uns cuantos folletos que tiñamos preparados sobre as obras del que temos na biblio.

Ensinámoslle a biblioteca, da que quedou encantado, e emplazounos para facer unha sesión nela cun grupo máis reducido. Aínda tivemos tempo para facernos unha foto, tomar café e charlar un pouquiño de literatura xuvenil. Aquí non podo deixar de dicir que tratou de "maestro" ao noso Agustín Fernández Paz, un orgullo para os que tivemos o placer de ler e compartir con el algunha das súas obras.

Dende a biblioteca queremos agradecer a súa colaboración e comportamento ao alumnado de 3º de ESO e ás profesoras Marian, Rosa e Inés polo traballo realizado con este libro.

NOTA: Podedes parar o cubo das fotos para velas mellor, se picades co rato sobre elas.

Celebración do día da poesía

2009-03-25T21:38:00.003+01:00

Este ano celebramos o día da poesía cos de primeiro e segundo de ESO. Repartimos once poemas galegos de distintas épocas e comentáronos nas clases. Ao día seguinte fixemos unha audición deses poemas musicados (grazas, sondepoetas, pola magnífica idea) e preparados en power point. Os de primeiro incluso se atreveron a cantar. Dende a bibioteca damos as grazas pola boa acollida que tivo esta iniciativa, polo bo comportamento de todos e, sobre todo aos de primeiro, polos aplauso que brindaron despois de cada canción. Entre isto e a anterior sesión con Asun Estévez chegamos coa poesía a todos os cursos. Esperamos que a partir de agora curioseedes un pouquiño máis polos libros de poesía que temos na biblio.

Pel de Muller

2009-03-14T09:58:00.003+01:00

O pasado xoves 12 tivemos na biblioteca un recital de poesía a cargo da poeta Asun Estévez e do alumnado do club de lectura. Foi, sen dúbida, o acto máis emotivo de todos os que se fixeron nesta biblio. Asun Estévez é unha muller que no seu primeiro libro, Pel de Muller, transmite con toda forza as emocións da súa experiencia vital, marcada pola superación dun cancro e pola súa loita contra esta enfirmidade dende a asociación ADICAM (Asociación de diagnosticadas de cancro de mama) da que é secretaria. Tiñamos preparado un acto ao que ía asistir TVE, pero, como soe ocurrir, non viñeron e... eles o perderon.

A autora foi presentada polo seu editor, Bieito Ledo(Ir Indo), e a continuación comezou o recital: primeiro o preparadopolo club, con cinco poemas acompañados de presentación en power point , dous con música gravada e un con música de violín (por Adrián, do club de lectura). Magníficas lecturas que deron paso ao recital da autora que, emocionada, case non podía articular as palabras. Pero iso foi un momento, porque ao empezar a recitar desatouse o furacán. Os seus poemas, na súa voz, acompañados maxistralmente ao piano por Getzabel Argüelles, profesora do conservatorio de Cangas, traspasáronnos a pel, deixáronnos mudos, atentos, clavados aos nosos asientos. Algunha bágoa deslizouse dalgúns rostros... A poesía atravesounos.

Xa ao remate, pero tamén telefonicamente ao día seguinte, recibimos a felicitación da autora e do editor polo recital do alumnado, pola atención e emoción demostradas e porque, como nos dixeron, tamén eles recibiron a emoción dende o auditorio.

Esta poesía, máis alá das consideracións literarias, gústanos: a poesía estivo entre nós, falounos, sacudiunos, golpeounos os sentidos e marchou para a súa casa deixandonos bo sabor de boca. Que máis se pode pedir?

Concerto de E-Trad

2009-03-14T00:46:00.003+01:00

Un ano máis tivemos no instituto aos mestres do conservatorio de música tradicional de Vigo nun concerto didáctico memorable. Músicos do máis alto nivel como Anxo Pintos, Xisco ou Rodrigo Romaní, entre outros, tocaron diversas pezas amosando distintos instrumentos tradicionais da música galega. Nesta ocasión tamén formaba parte do grupo o noso compañeiro Chuco (ex Chouteira). Ao final o alumnado que quixo subiu a tocar cos mestres, reservando unha última actuación para o grupo do insti "Os farfalleiros". Pero non todo foi música: tamén houbo baile. Unha festa que este ano quixemos facer na semana da Muller.

Mulleres que puxeron música e cor no mundo

2009-03-14T00:28:00.004+01:00

Ese é o título da exposición coa que iniciamos o pasado luns día 9 os actos adicados á Muller. Trátase dun proxecto ALFIN levado a cabo polos departamentos de música, plástica e biblioteca. O alumnado de bacharelato buscou e seleccionou a información e despois elaborou as láminas que foron colocando en paneis ao longo da semana. Realizouse unha selección representativa de mulleres compositoras e pintoras ao longo da historia. Na presentación deixámosvos algunhas fotos da exposición, que colgaremos completa no blog en formato libro dixital.

O señor Ibrahim e as flores do Corán

2009-03-12T18:16:00.003+01:00

O pasado luns tivemos unha interesante sesión do club de lectura arredor do libro O señor Ibrahim e as flores do Corán. Démoslle a benvida a un novo membro, Rubén. Comezamos de maneira distendida ao redor da comida que cadaquén trouxo de casa. Un libro tan pequeniño e deu para tanto! Tolerancia, convivencia, relixión, guerras, Oriente Próximo, Hollywood, Terceira Guerra Mundial...(?) Unha morea de temas saíron á palestra. Tamén comezamos a distribuír o traballo para a sesión do xoves, un recital de poesía do libro "Pel de muller" a cargo da súa autora, Asun Estévez, e o club de lectura. Ese recital pechará as actividades da Semana da Muller.

Velaí algunhas fotos da sesión do luns á espera de ler a crónica no blog do club de lectura.

BubbleShare: Share photos - Find great Clip Art Images.

As mulleres da literatura española.

2009-03-08T20:14:00.003+01:00

Grazas a trafegando ronseis chéganos, un ano máis, este interesante traballo sobre as mulleres da literatura española, que ven a completar o públicado o ano pasado. Reproducimos o texto desa entrada:

Hai un ano falabamos da historia das mulleres que escribiron ao longo da historia e que apenas coñecemos, se é que algo nos poden soar os seus nomes. Recollemos a presentación do ano pasado e realizamos unha nova, de xeito que abranguemos toda a historia da literatura española até o século XX, non incluído.Afírmase que o feminismo xurdiu cando unha muller aprendeu a ler, pero isto é certo se engadimos que foi cando tamén aprendeu a escribir. A maior parte das mulleres foron reducidas a unha especie de semianalfabetismo durante moito máis tempo cós homes. E necesitaron moito máis tempo aínda para acceder á liberdade intelectual de escoller os seus temas de lectura. Pero a loita máis longa tivérona que protagonizar para conseguir seren recoñecidas pola súa produción escrita. Moitas veces practicada en segredo, agochada baixo nomes masculinos, imos ver como moitas delas tiñan acceso á escrita grazas aos muros dos conventos, situación que cambiará a partires do século XIX. Pondo o hábito, as mulleres gañaban un pouco en mobilidade social, pagando un alto prezo: renunciar á súa feminidade e á súa sexualidade.

No século XIX a muller érguese para realizar o seu destino, a súa vida e a súa morte. Que as mulleres escriban -ben ou mal, importa menos- e que o fagan para publicar no século XIX é un paso, unha revolución sen volta atrás. Coller a pluma era coller a espada, contra todo. Escribir delataba vida intelixente, vida pensante inexpresada durante séculos: unha non historia que agora comeza a se converter en historia.

PARA VER AS PRESENTACIÓNS PICA NESTE ENLACE

Día Internacional da Muller. Haberá futuro.

2009-03-07T22:13:00.009+01:00

No noso instituto imos celebrar con diversos actos, impulsados pola biblioteca e a vicedirección, o Día Internacional da Muller. Cada un deles terá a súa propia entrada no blog. O luns 9 colocaremos polos corredores a exposición "As mulleres na arte e na música", un proxecto documental que implicou á biblioteca e aos departamentos de música e plástica. O martes teremos o concerto de Tradurbán, a banda integrada polos mestres da Fundación Sondeseu, con Rodrigo Romaní á cabeza. O xoves realizaremos na biblioteca un recital de poesía a cargo da autora Asun Estévez e dos integrantes do club de lectura. Asun Estévez, que vén de publicar o poemario Pel de muller, é unha muller loitadora, secretaria da asociación ADICAM (Asociación de Mulleres Diagnosticadas de Cancro de Mama) que, despois de sufrir unha grave enfermidade, escribiu uns poemas cheos de vida. O seu recital estará acompañado por música de piano e será gravado pola TV Española.

No noso centro cremos que é necesario celebrar estas e outras efemérides, en contra do que opinan algunhas voces críticas, sobre todo ultimamente. E por primeira vez, e vendo algúns feitos que están a suceder, utilizarei este blog para dar unha opinión persoal:

A realidade é que hai máis mulleres ca homes, que son elas as que rematan máis carreiras universitarias, que na empresa privada fan os mesmos traballos cobrando menos, que se lles poñen trabas nos traballos (soldos discriminatorios, despidos por embarazo, acosos...), que os "machitos", aínda por riba, lles esixen ter as camisas alisadas, as camas feitas, etc., etc., etc... E XA ESTÁ BEN.

En que país estamos a vivir? Fanse discursos demagóxicos para ir en contra das cotas nos órganos de goberno ("Que se queremos ao mellor médico ou ao mellor xuíz... sen importar se é home ou muller"). Oxalá non fosen necesarias as cotas! Pero o caso é que ese tipo de discurso penetra entre a poboación, SENDO FALSO NA SÚA BASE. En primeiro lugar porque hai tantas ou máis mulleres preparadas para gobernar coma homes. En segundo lugar porque se non as houbo antes foi porque ata hai pouco a SOCIEDADE e a lei impedían vilmente o acceso da muller aos estudos e o traballo, establecendo uns roles absolutamente discriminatorios e indignos na sociedade actual. En terceiro lugar porque os gobernos non só han de ser bos, senón que han de dar exemplo á cidadanía, que ten que observar e APRENDER que é igual o sexo co que se fan as cousas, o vestido ou o smoking que se leva posto, a cor da pel... (a sociedade americana, tan deostada ás veces por outras cousas, poderíanos dar unhas leccións acerca disto).

É necesario camiñar cara a un futuro no que poidamos deixar de comentar ese tipo de aspectos. Os gobernos son un espello, ao igual que o debemos ser os docentes. As discriminacións positivas son necesarias para que algún día deixen de selo. Cada quen pode facer da súa capa un saio, pero gobernar non é só dar leis: é levar o temón no rumbo correcto e non perder norte, un norte que aínda non temos acadado.

En galego, sen perdón

2009-03-04T00:31:00.007+01:00

Dende a pasada semana, e como pequena homenaxe ao aniversario da nosa Rosalía, temos exposta na biblioteca unha mostra retrospectiva de debuxos humorísticos sobre o uso da nosa lingua. Os debuxos son do noso compañeiro Xosé Carlos, e en tono de humor repasan algúns dos tópicos e prexuizos que ao longo dos anos acompañaron e acompañan á nosa lingua. Velaí unha pequena mostra.

Novos cómics en galego

2009-03-03T12:00:00.003+01:00

Deixamos aquí esta presentación das novidades de cómic en galego. Xa dispoñedes deles na sección de cómic da biblioteca.

Olimpiada Matemática. Premio para Diego.

2009-02-19T18:45:00.005+01:00

Pero, que pasa cos matemáticos deste instituto? Os días 6 e 7 de Febreiro de 2009 celebrouse na facultade de matemáticas de Santiago a fase galega da olimpiada matemática para bacharelato, donde o noso alumno DIEGO PÉREZ ESTÉVEZ foi un dos 9 gañadores da mesma, acadando un terceiro premio. Diego acudirá á fase final estatal que se celebrará en Girona, do 26 ao 29 de Marzo. Parabéns para Diego, que é un vello coñecido desta biblioteca, colaborando con diversas actividades en numerosas ocasións: o ano pasado gañou o concurso de postais de Nadal e foi un dos factotum da exposición sobre o LCH. Aquí tedes a foto de Diego recollendo un premio da biblio no curso pasado.

Libro do mes: Charlie e a fábrica de chocolate

2009-02-17T21:22:00.002+01:00

Mozos e mozas de primeiro ciclo da ESO: non perdades a oportunidade de ler este fabuloso libro de Roald Dahl e conseguir máis bibliopuntos. Os bibliopuntos poden servir para gañar o premio deste mes ou para acumulalos e gañar o concurso anual. Non necesitades inscribirvos, só ledes o libro e acudides á biblioteca o día que se vos indique. O libro vaivos gustar, seguro. Ademáis podedes traer as vosas ilustracións sobre este libro, entragádeas na biblioteca no plazo dun mes e unha delas será a gañadora dun premio da biblioteca.